আমেৰিকান জীৱনধাৰা - ২

গোলকীয় অৰ্থনৈতিক মন্দাৱস্থাৰ পৰৱৰ্তী সময়ত আমেৰিকানসকলৰ ওপৰত পৰা প্ৰভাৱৰ বিষয়ে আগেয়ে কিছু উল্লেখ কৰিছোঁ | প্ৰকৃততে বৰ্তমান আমেৰিকাৰ সাধাৰণ নাগৰিকে এতিয়াও এই প্ৰভাৱৰ পৰা মুক্তি বিচাৰি অ'বামা চৰকাৰৰ পৰা ধনাত্মক পদক্ষেপ আশা কৰি ধৈৰ্য্য সহকাৰে বাট চাই আছে | বৰ্তমান অৱস্থাত সম-পৰ্য্যায়ৰ ভাৰতীয় সকলৰ সৈতে তুলনা কৰিলে মধ্যবিত্ত আমেৰিকান সকলৰ সামগ্ৰিক অৱস্থাটোৰ বৰ বেছি পাৰ্থক্য নাই |

চৰকাৰীভাৱে আৰোপিত বিভিন্ন কৰ-কাটল, উচ্চ হাৰত বাধ্যতামূলক বীমাকৰণ আৰু ৰাজহুৱা নিয়ন্ত্ৰণ ব্যৱস্থা আদিক লৈ সৰহভাগ লোকেই সন্তুষ্ট নহয় | বিদ্যুত্‍ শক্তি, পানীযোগান, অনাময় ব্যৱস্থা আৰু অন্যান্য যাৱতীয় সা-সুবিধা যদিও ইয়াত অতি সুচাৰুৰূপে আৰু অবিৰতভাৱে উপলব্ধ, ইয়াৰ বাবে দিব লগীয়া বৰ্দ্ধিত মাচুলে সাধাৰণ নাগৰিকক যথেষ্ট অসুবিধাত পেলাইছে | ঘৰৰ ইন্টাৰ্‌নেট আৰু কেবল্‌ টিভিৰ সংযোগৰ বাবেই এটা পৰিয়ালে দিবলগীয়া হয় গড় হিচাপত ১০০-১২০ ডলাৰ | পানীৰ ব্যৱহাৰত চৰকাৰী নিয়ন্ত্ৰণ মন কৰিবলগীয়া | কোনো নাগৰিকে  ঘৰুৱা অথবা কাৰ্যালয় বা ব্যৱসায়িক স্থানত পানীৰ অপব্যৱহাৰ বা অপচয় কৰাটো আইন-বিৰুদ্ধ | আনকি সাধাৰণভাৱে আমাৰ নিচিনাকৈ ঘৰতে গাড়ী বা অন্য বাহন ধোৱা-পখলা কৰাটোও নিষেধ | পানীৰ অপচয় নিৰীক্ষণ কৰাৰ কাৰণে আৰক্ষীৰ এক বিশেষ শাখা ২৪ ঘন্টা কৰ্মৰত | আনকি মাজে মাজে ম‍ই কাম কৰা গৱেষণাগাৰতো পদাৰ্পণ কৰি নিৰীক্ষণ কৰে |

আমাৰ দেশৰ দৰে ইয়াত ঘৰত কাম কৰাৰ বাবে সস্তীয়া বন কৰা ল’ৰা-ছোৱালী বা কাম্‌লা ৰখাৰ কোনো ব্যৱস্থা প্ৰচলিত নাই | সকলো মানুহেই নিজৰ কাম নিজেই কৰি লয় | অৱশ্যে প্ৰয়োজন হ’লে ঘৰ চাফ কৰিবলৈ বা ঘৰৰ যিকোনো কাম কৰিবলৈ মহিলা বা পুৰুষ নিয়োগ কৰিব পাৰি | তাৰ কাৰণে কিছুমান ব্যক্তিগত এজেন্সী আছে; তেওঁলোকক ফোন কৰি মাতি দিলেই গাড়ীৰে আহি ঘৰত উপস্থিত হয় | বিশেষকৈ চান্‌ ডিয়েগো চহৰত এনে ধৰণৰ একোটা এজেন্সী কেইবাগৰাকীও মেক্সিকান মহিলাই একেলগে মিলি চলায় | কিন্তু তাৰ বাবে ঘৰৰ গৃহস্থ‍ই দুই-তিনি ঘন্টাতে অন্ততঃ ১০০ ৰ পৰা ১২০ ডলাৰ ভৰিব লগীয়া হয় | গতিকে কিমানজনে এই মূল্য ভৰিব পাৰে ?

চান্‌ ডিয়েগো চহৰত দেখিছো ঘৰৰ বাহিৰৰ প্ৰায়ভাগ কঠোৰ পৰিশ্ৰম সাধাৰণতে মেক্সিকান সকলে কৰে | ৰাস্তাত কাম কৰি থকা চাফাই কৰ্মী বা অন্যান্য শ্ৰমিকসকলৰ মাজত কাচিত্‌হে এজন-দুজন আমেৰিকান চকুত পৰে | আনকি চিটিবাছৰ চালক পুৰুষ আৰু মহিলা প্ৰায়ভাগেই হয় আফ্ৰিকান আমেৰিকান নহয় মেক্সিকান | মোৰ প্ৰতিৱেশী চিজাৰৰ মতে হেনো এইবোৰ সৰু কাম কৰিবলৈ আমেৰিকান সকলে ভাল নাপায় | আমাৰ অসমীয়াৰ দৰেই ‘বাবু’ মনোবৃত্তি এটা অলপ আছেনেকি !

অৱশ্যে নিজৰ ঘৰৰ সকলোখিনি কামেই সকলোৱে নিজেই কৰি লয় | এই ক্ষেত্ৰত মোৰ ভাৰাঘৰৰ গৃহস্থ পৰিয়ালটোৰ কথাই ক’ব পাৰি | পুৰুষ-মহিলা দুয়োজনেই ব্যৱসায় কৰে | পুৰুষজনে গাড়ীৰ অযান্ত্ৰিক অৰ্থাত্‍ শাৰীৰিক অংশ মেৰামতি  আৰু ৰং কৰা কাৰখানাত কাম কৰে, আৰু মহিলা গৰাকীয়ে সা-সম্পত্তি বেচা-কিনা কৰাৰ মধ্যভোগী হিচাবে ব্যৱসায় কৰে | কিন্তু বিশেষকৈ মহিলা গৰাকীয়ে ঘৰত থকা অৱস্থাত পাকঘৰৰ কাম, ঘৰ পৰিস্কাৰ কৰা কাম আৰু ঘৰ-সজোৱা, চিলাই কৰা আদি কামো ভাৰতীয় মহিলাসকলৰ নিচিনাকৈয়ে কৰে | আমাৰ সৰহ সংখ্যক লোকৰে থকা ভুল ধাৰণাৰ নিচিনাকৈ এওঁলোকে ঠেঙৰ ওপৰত ঠেং তুলি খাবলৈ নাপায় | মাজতে এদিন এওঁলোকৰ ঘৰলৈ পুতেক-বোৱাৰীয়েক (প্ৰায় ৪০ মাইলমান দূৰত থাকে) সন্ধিয়া ফুৰিবলৈ আহিছিল | সেইদিনা দেখিলো আমাৰ ভাৰতীয় মহিলাৰ দৰেই মাকে আবেলিৰে পৰা ভিন-ভিন খাদ্য ৰন্ধাত ব্যস্ত; পুতেক-বোৱাৰীয়েকক ৰাতিৰ আহাৰ খুৱাইহে পঠিয়ালে | আমাকো, অৰ্থাত্‍ মোক আৰু চিজাৰকো তাৰ কিছু ভাগ দিলে |

যোৱা শনিবাৰে বন্ধৰ দিনা আমাৰ ভাড়াঘৰৰ মালিকজনে ঘৰৰ কাম কৰা দেখি ম‍ই আচৰিত হ’লো | ৰাতিপুৱা ৭ মান বজাতে তেওঁ গেৰেজত এটা চেল্ফ (shelf) বনোৱাৰ কাম আৰম্ভ কৰিলে | গোটেই দিনটো অকলে কাঠৰ কাম কৰি গধূলি ৮ মান বজালৈ একেদিনাই কামটো শেষ কৰি উলিয়ালে | কাঠৰ কামতো তেওঁ অতি পাকৈত | পেচাদাৰী কাঠমিস্ত্ৰীৰ দৰেই ! আনহাতে তেওঁৰ পৰিবাৰে সময়ে সময়ে তেওঁক ঠাইতে খোৱা বস্তুৰ যোগান ধৰি থকাৰ উপৰিও দিনটোৰ বাকীখিনি সময় তেওঁৰ কাষতে চকী এখনত বহি মনোবল বঢ়াই আছিল | কি এক আদৰ্শনীয় আন্তৰিক সম্পৰ্ক ? সঁচাকৈয়ে ম‍ই তেওঁলোকক প্ৰশংসা নকৰি নোৱাৰিলো |

আমাৰ ভাৰতীয় সমাজত আমেৰিকান সকলৰ বিষয়ে থকা আন এটা ভুল ধাৰণা হ’ল যে আমি ভাবো ইয়াত বুঢ়া মাক-দেউতাক বিলাক বৰ অসহায় আৰু তেওঁলোকৰ যত্ন পুত্ৰ বা জীয়ে নলয় ! কিন্তু ই একেবাৰে সত্য নহয় | ম‍ই অন্ততঃ এতিয়ালৈকে কেইবাটাও পৰিয়ালত দেখিছো বৃদ্ধ পিতৃ-মাতৃ পুতেক-বোৱাৰীয়েকৰ লগত একেলগে বাস কৰা | উদাহৰণ স্বৰূপে মোৰ গাইড ডঃ মেক্‌ক্লিলেণ্ডলৈকে আঙুলিয়াব পাৰি | তেওঁ নিজে দুবাৰ বিয়া কৰাইছে | আগৰ গৰাকী পত্নীৰ সৈতে বিচ্ছেদ হোৱাৰ পাচত পুণৰ এগৰাকী বিয়া কৰায় | তেওঁ নিজে কোৱা মতে আগৰ গৰাকীক বোলে বিচ্ছেদৰ সময়ত বহুত কিবা-কিবি দিয়াৰ উপৰিও এটা ধুনীয়া থকাঘৰ দিবলগীয়া হ’ল | সেইকাৰণে তেওঁলোকে এতিয়া এটা সৰু ঘৰত থাকিবলগীয়া হৈছে | আগৰ গৰাকীৰ সন্তান তিনিটা আৰু বৰ্তমানে থকা গৰাকীৰ দুটা | বিচ্ছেদৰ সময়ত হোৱা আন এটা সিদ্ধান্ত মৰ্মে আগৰগৰাকীৰ তিনিটা সন্তানো তেওঁৰ ঘৰত সপ্তাহটোৰ তিনিদিন থাকে | ইয়াৰ উপৰিও তেওঁৰ সৈতে থাকে তেওঁৰ প্ৰায় ৭৫-৮০ বছৰীয়া বৃদ্ধ দেউতাক | দেউতাকৰ যদিও এটা নিজা ঘৰ আছে, বৰ্তমানে তেওঁৰ লগতে থাকে | আনকি সিদিনা আমাৰ প্ৰতিষ্ঠানটোৰ প্ৰতিষ্ঠা দিৱসৰ অনুষ্ঠানটিলৈকো পত্নী আৰু সন্তানকেইটিৰ লগতে দেউতাককো লৈ আহিছিল |

অন্য এজন ব্যক্তিৰ উদাহৰণো এইখিনিতে ডাঙি ধৰিব পাৰি | ম‍ই কাম কৰা প্ৰতিষ্ঠানটোৰ মুখ্য প্ৰশাসনিক বিষয়া ৰিচাৰ্ড ই ব্ৰেণ্ডট্‌ আগেয়ে নৌ বাহিনীৰ বিষয়া আছিল | ২০০০ চনত নৌ-বাহিনীৰ পৰা অৱসৰ লোৱাৰ পাচত তেওঁ ঘৰৰ একমাত্ৰ ল’ৰা হিচাবে মিছিগানত সেই সময়ত খেতি-বাতি কৰি থকা বৃদ্ধ দেউতাকৰ সৈতে থকাৰ সিদ্ধান্ত লয় আৰু ২০০৩ চনলৈকে তেওঁক খেতি-খোলাৰ কামত সহায় কৰে | প্ৰকৃততে তেওঁ যদিও এইবাবে সুখী নাছিল, তথাপি দেউতাকক তাৰ পৰা স্থানান্তৰিত কৰাৰ বাবে মান্তি কৰাব নোৱাৰাত দেউতাকৰ প্ৰতি দায়িত্ব পালন কৰি তাতেই চাৰি বছৰমান কটালে | পাচত কোনোমতে দেউতাকক সন্মত কৰাই মিছিগানৰ সকলো সম্পত্তি লীজত দি চাকৰিৰ সন্ধানত ওলাই আহিল | আগতে বেলেগ দুটা প্ৰতিষ্ঠানত কমসময়ৰ কাৰণে কাম কৰাৰ পাচত অৱশেষত ২০০৪ চনত আমাৰ প্ৰতিষ্ঠানটোত যোগ দিয়ে | এতিয়া প্ৰায় ৮০ বছৰীয়া তেওঁৰ বৃদ্ধ পিতৃও তেওঁলোকৰ লগতে থাকে |   

চান্‌-ডিয়েগোৰ সৌন্দৰ্য্য : ৩

কালি আছিল দেওবাৰ | পৰহি ৰাতিয়েই ঠিক কৰি থৈছিলো যে পুৱা চিজাৰৰ সৈতে অলপ ফুৰিবলৈ ওলাই যাম | সেইমতে ৯ মান বজাতে ঘৰৰ পৰা ওলাই গৈ প্ৰথমতে চুলি কটোৱাৰ বাবে এখন চেলুন (নে চেলন?)ত সোমালো | তাতো আকৌ নাম পঞ্জীয়ন কৰিব লাগে | মোক গ্ৰাহক নম্বৰটো সোধাত ম‍ই যেতিয়া প্ৰথমবাৰৰ কাৰণে অহা বুলি ক’লো, কম্পিউটাৰত মোৰ নাম পঞ্জীভূক্ত কৰিলে আৰু মোক ২৫ মিনিট সময়ৰ পিচত আহিবলৈ অথবা সেইখিনি সময়ৰ বাবে তাতে বহিবলৈ ক’লে | শীত-তাপ নিয়ন্ত্ৰিত কোঠালীত বহাৰ সুন্দৰ সুবিধা আছিল যদিও আমি দুয়ো কথা পাতি ঠিক কৰিলো যে ইতিমধ্যে কিবা এটা খায়ে অহা যাওক; দুয়ো পুৱাৰ আহাৰ নোখোৱাকৈয়ে আহিছো | গতিকে কাষতে থকা ৰুবিঅ’ (Rubio) নামৰ মেক্সিকান ৰেষ্টুৰাঁ এখনলৈ গৈ ফিচ্‌ টাক’ (Fish Taco)বোলা এবিধ খাদ্যৰ নিৰ্দেশ দিলো | এইবিধ খাদ্যও হেনো মেক্সিকোত বৰ জনপ্ৰিয় | সোৱাদত অৱশ্যে ম‍ই কেইদিনমানৰ আগেয়ে খোৱা বুৰিট’(Burrito)ৰ লগত বহুত মিল আছে | এইবিধত যেনিবা দুখন লুচি দুভাঁজ কৰি তাৰ মাজত ক্ৰিম, বিলাহী, চালাড আৰু মছলা ভৰাই থোৱা থাকে | লগত দিয়ে আমাৰ ভজা পাপৰৰ দৰে টুকুৰা কিছুমান | অৱশ্যে ইয়াৰ লগত নিজৰ পছন্দ অনুসৰি যিকোনো এবিধ লঘূ পানীয় এগিলাছ বা দুগিলাছ খাব পাৰি | নিজ ইচ্ছা অনুসৰি তিনি-চাৰি বিধমান বিভিন্ন ধৰণৰ চাট্‌নি আৰু চছ্‌ আদিও লগত ল’ব পাৰি | খাই বেছ ভাল লাগিল আৰু ভোকো গুছিল | দুপৰীয়াৰ আহাৰ বেলেগে নাখালেও হ’ব !

ইতিমধ্যে মোৰ চুলি কটোৱাৰ সময়ো হৈছিল | চুলি কটাৰো বৰ সুন্দৰ ব্যৱস্থা ! ১৮-২০ বছৰীয়া ছোৱালী এজনীয়ে আগবঢ়াই নি আসনত বহুৱালে | প্ৰায় ১৫ মিনিট মানতে বৰ সুন্দৰকৈ কাটি অঁটালে | মোৰ কাটটোৰ নাম হ’ল - ভাৰচিটী কাট (Varsity cut), বোধকৰো কাষতে থকা কেলিফোৰ্ণিয়া বিশ্ববিদ্যালয়ৰ নামেৰেই এই নাম | এইটো কাটতে দাম আটাইতকৈ কম; কম-বয়সীয়া ল’ৰাৰ বাবে $ ১৪ ডলাৰ, বয়োজ্যেষ্ঠ নাগৰিকৰ বাবে $ ১৬ ডলাৰ আৰু বাকীসকলৰ বাবে $ ১৮ ডলাৰ | গতিকে মোৰ বেলিকা শেষৰ হাৰটোৱেই প্ৰযোজ্য হ’ল, অৰ্থাত্‍ প্ৰায় ৯০০ টকা ! আয়ৈ, এইখিনি প‍ইচাৰে এবাৰত ২০ টকাকৈ গুৱাহাটীত মোৰ দৰে মানুহে কিমানবাৰযে চুলি কটাব পাৰিলোহেঁতেন ! বোধকৰোঁ এইটো কৰাণতে ইয়াত য’তে-ত’তে চুলি দীঘলকৈ ৰখা মানুহ দেখা পাওঁ ! মোৰ ভাড়াঘৰৰ মালিকৰ চুলিও বোলে তেওঁৰ ঘৈণীয়েকেহে কাটি দিয়ে |

তাৰ পৰা বাহিৰে বাহিৰে বাছেৰে ক্লেয়াৰমন্ট মেছা- Clairmont Mesa (মেছাৰ অৰ্থ সৰু বা কম ঠাইত বিস্তৃত, উপত্যকা) নামৰ এলেকাত থকা এখন বিশেষ দোকানলৈ গ’লো | দোকানখনৰ নামেই হ’ল ৯৯.৯৯ ষ্ট’ৰ, অৰ্থাত্‍ ইয়াত প্ৰতিটো বস্তুৰ দামেই হ’ল - ৯৯.৯৯ চেন্ট (প্ৰায় ৪৮ টকা)| এইখনৰ দৰে আৰু তাতোকৈও অলপ উন্নত ডলাৰ ৩ নামৰ বহু দোকান আমেৰিকাৰ বিভিন্ন ঠাইত আছে | আমাৰ তাৰ "হৰেক মাল ১০ ৰুপিয়া" বুলি ঘৰে ঘৰে ঘূৰি ফুৰা বেপাৰী বোৰৰ নিচিনা | ইয়াত জানিবা ই অতি শৃংখলাৱদ্ধভাৱে পতা বৃহদাকাৰ দোকানৰ ৰূপত ! চিজাৰ আৰু ম‍ই দুয়ো কিছু বস্তু কিনিলো | ঘূৰি ঘৰ আহি পাওঁতে প্ৰায় তিনি বাজিছিল |

সন্ধিয়া আমাৰ ভাড়াঘৰৰ গৰাকী আৰু তেখেতৰ পৰিবাৰে (কেভিন আৰু জিনা গুড্‌‍উইন) চিজাৰ আৰু মোক লগ ধৰিলে ব্লেক্‌ মাউন্টেইনৰ ভাৰতীয় ৰেষ্টুৰাঁখনত একেলগে ৰাতিৰ আহাৰ খাবলৈ যোৱাৰ কাৰণে | আচলতে সিদিনা চিজাৰ আৰু ম‍ই তাত খাই অহাৰ পাচত চিজাৰে তেওঁলোকৰ আগত যিটো বৰ্ণনা দিছিল, তাৰ প্ৰভাৱতে বোধকৰোঁ তেওঁলোকেও তালৈ গৈ এসাঁজ খাবলৈ মন কৰিলে | অহা শুকুৰবাৰে চিজাৰ একবাৰে যাবগৈ; গতিকে  সেইটো‍ও এটা কাৰণ | আমি তেওঁলোকৰ গাড়ীৰে ৭ মান বজাত ওলাই গ’লো | পিচে আমি সেইদিনাখন খোৱাৰ দৰে বুফে (buffet) খানা খাবলৈ নাপালো; সেইটো মাত্ৰ দুপৰীয়াহে উপলব্ধ | যি কি নহওক, চুইট কৰ্ণ চুপ (Sweet corn soup), ভেজিটেব্‌ল পক’ৰা, (Vegetable pakora) ভাত, বাটাৰ নান্‌ (Butter nun), তণ্ডুৰী ৰুটি, শাকৰ সৈতে মুৰ্গীৰ আঞ্জা (Chicken saag), পনীৰ বাটাৰ মছলা (Paneer butter masala) আদিৰে সৈতে বৰ বঢ়িয়াকৈ এসাঁজ চাৰিওজনে মিলি খালো | মোৰ বেছি ভাল লাগিল তেওঁলোকে ভাৰতীয় খাদ্য অতি পৰিতৃপ্তিৰে খোৱা দেখি | অসমীয়া ব্যঞ্জনেৰে এসাঁজ খুৱাব পৰা হ’লে আৰু ভাল লাগিলহেঁতেন !

খোৱা-বোৱা হোৱাৰ পাচত আমি গোটেইকেইজন ওচৰতে থকা ‘বম্বে বাজাৰ’ নামৰ ভাৰতীয় গেলামালৰ দোকানখনত সোমালো | পিচে তাতহে এটা অঘটন হ’ল | যিমানেই নহওক, আমাৰ ভাৰতীয় মানুহৰ দোকানতো ! সিমান পৰিপাটী আৰু চিজিল নহয়; গ্ৰাহকে চলা-ফুৰা কৰা ঠাইখিনিৰ মাজতে এটা কাৰ্টন  (Carton) থোৱা আছিল | আমি মন কৰা নাছিলো | বস্তু চাই চাই আগবাঢ়ি গৈ থাকোঁতে আমাৰ ভাড়াঘৰৰ মালিকৰ পৰিবাৰ উজুতি খাই পকাত বাগৰি পৰিল | কিছু সময়ৰ বাবে হুৱা-দুৱা লাগিল | বৰফ দিয়া হ’ল; অলপ সৰু-গাঁঠিৰ ওচৰত ফূলি উঠিল | বোধকৰো হাঁড় নাভাগিলেও বেয়াকৈ মোছোকা খালে | পিচতহে গম পোৱা যাব ! সদ্যহতে দোকানৰ কৰ্মচাৰীয়ে আনি দিয়াত আৰু আমাৰ মালিকৰ অনুৰোধত ময়ে এটা ক্ৰেপ্‌ বেণ্ডেজ বান্ধি দিলো | মহিলাগৰাকী কিন্তু অলপো হতাশ হোৱা নাছিল | বৰঞ্চ তেৱেঁই আগভাগ লৈ দোকানৰ কৰ্মচাৰীৰ পৰা তেওঁলোকৰ দোকানৰ সৱিশেষ লিখাই ল’লে | প্ৰয়োজন হ’লে তেওঁলোকে ক্ষতিপূৰণ দাবী কৰিব !

চিজাৰ আৰু ম‍ই সিমানতে ঘৰলৈ ঘূৰি আহিব খুজিছিলো | কিন্তু তেওঁলোক মান্তি নহ’ল | তাৰ পৰা বাহিৰে বাহিৰে আকৌ আমাক ফুৰাবলৈ লৈ গ’ল - চান্‌ ডিয়েগো ক’ভ্‌চ (San Diego Coves) নামৰ এলেকাটোলৈ | সাগৰৰ পাৰত অৱস্থিত এই এলেকাটো অতি ধুনীয়া আৰু চহকী মানুহৰ বাসস্থান | বৰ ধুনীয়া ধুনীয়া ঘৰবোৰ, চালে চকু ৰোৱা ! আমাক কোৱামতে একোটা ঘৰৰ দাম ২০০ নিযুত ডলাৰতকৈও অধিক | প্ৰথমতে তাতে এখন ৰেষ্টুৰাঁত সোমাই একাপ একাপ কফি আৰু পেষ্ট্ৰি (Pastry) খালো | কফি খোৱাৰ বিষয়েও এটা কথা কৈ থওঁ - আমেৰিকানসকলে যথেষ্ট সঘনাই কফি খায় | একোটা কফি কাপত (নে গিলাছত !) আধা লিটাৰ মান ধৰে | তেনেকুৱা কাগজৰ বা প্লাষ্টিকৰ বন্ধ কাপত গাঢ়, ফিকা কফি (Black coffee) লৈ ফুৰা মানুহ বজাৰে-সমাৰে দেখাৰ উপৰিও ৰাস্তাত, আনকি বাছতো প্ৰায়ে দেখা যায় | আমাৰ কফি কেইকাপ ইমানেই কাঢ়া আছিল যে ম‍ই দুশোহা মান মৰাৰ পাচতে মুখ দেৰ্‌দেৰাই গ’ল | আৰু খোৱাৰ ইচ্ছা নগ’ল | অলপ গাখীৰ মিহলাইও চালো; পিচে নোৱাৰিলো | আচৰিত  কথা কি - চিজাৰে ম‍ই আধা খোৱা কফি কাপো খোৱাৰ ইচ্ছা কৰি মোৰ অনুমতি বিচাৰিলে | কফি খোৱাৰ লোভ দেখিলো মেক্সিকানৰো কম নহয় ! জুঠা কফিও নেৰে !

ৰেষ্টুৰাঁৰ পৰা ওলাই আহি সাগৰৰ পাৰত কিছু সময় কটালো | ৰাতিৰ আন্ধাৰত সাগৰৰ নাও আৰু জাহাজ চাই আপ্লুত হ’লো | ঘূৰি আহোতে ৰাস্তাত এখন বিখ্যাত ফেৰাৰী (Ferari) গাড়ীৰ শ্ব’-ৰুম (Show room) দেখা পাই চিজাৰে গাড়ী ৰখোৱাই মোৰ লগত নামি গৈ ফটো তুলিলে | তেওঁৰ গাড়ীৰ হেঁপাহ অতি বেছি - সৰু ল’ৰাতো !

ঘৰ আহি সোমাওঁতে ৰাতি প্ৰায় ১০:৩০ বাজিল | মুখ-হাত ধুই উঠাৰ পাছতে গুৱাহাটীৰ আমাৰ কলেজৰ পৰা স্কাইপৰ জড়িয়তে ফোন কৰিলে | ৰাতুলদা আৰু অৰুণাভৰ লগত বহু সময় কথা পাতিলো | শোওঁতে প্ৰায় ১২:৩০ বাজিছিল |

আমেৰিকান জীৱনধাৰা

ভাৰতৰ দৰে তৃতীয় বিশ্বৰ দেশসমূহত চৰকাৰী আৰু বেচৰকাৰী খণ্ডত কাম কৰা চাকৰিয়ালসকল তেওঁলোকৰ বেতন তথা আনুষঙ্গিক সা-সুবিধা সম্পৰ্কে সাধাৰণতে সন্তুষ্ট নহয় | বিশেষকৈ ভাৰতত নিয়মীয়া মুদ্ৰাস্ফীতি আৰু নিত্য-ব্যৱহাৰ্য সামগ্ৰীৰ বৰ্দ্ধিত মূল্যৰ হেঁচাত পৰি সৰহ সংখ্যক ৰাজহুৱা তথা ব্যক্তিগত খণ্ডৰ কৰ্মচাৰীয়েই জীৱনৰ নিম্নতম প্ৰয়োজনীয়খিনি আহৰণ কৰাটোও দূৰূহ হৈ পৰে | কিন্তু আমেৰিকা হ’ল বিশ্বৰ সবাতোকৈ চহকী আৰু প্ৰতিপত্তিশালী দেশ | আমাৰ দেশত শিক্ষিত লোকসকলৰ মাজত এটা সাধাৰণ ধাৰণা যে আমেৰিকাৰ দৰে দেশত সাধাৰণ নাগৰিক আৰু বিশেষকৈ চাকৰিয়ালসকলৰ আৰ্থিক অৱস্থা অতি টনকিয়াল আৰু তেওঁলোক আপাততঃ সুখী | প্ৰকৃততে এই ধাৰণা সত্যনে? আনহাতে এই কথা ইতিমধ্যে সৰ্বজনবিদিত যে বিগত কেইবছৰমানৰ পৰা চলি থকা গোলকীয় আৰ্থিক মন্দাৱস্থাৰ ঋণাত্মক প্ৰভাৱ ভাৰতবৰ্ষৰ তুলনাত আমেৰিকা আৰু ইউৰোপৰ চহকী দেশসমূহৰ ওপৰত অধিক প্ৰবল ৰূপত পৰিস্ফুট হৈছে | এই পৰিপ্ৰেক্ষিতত মোৰ নিতান্ত‍ই জানিবলৈ আগ্ৰহ হৈছিল বৰ্ত্তমান আমেৰিকাৰ নাগৰিকসকলৰ, বিশেষকৈ চাকৰিয়ালসকলৰ জীৱনধাৰা কেনে আৰু আৰ্থিকভাৱে তেওঁলোক কিমান স্বচ্ছল?

বিগত তিনিটা মাহত এই সম্পৰ্কে ম‍ই যিখিনি তথ্য আৰু মতামত আহৰণ কৰিবলৈ সক্ষম হৈছো, তাৰ ওপৰত ভিত্তি কৰি মোৰ ধাৰণা হৈছে যে আমাৰ দেশত সাধাৰণতে ভবাৰ দৰে আমেৰিকানসকলৰ জীৱন বৰ্ত্তমান সিমান সুখ আৰু স্বাচ্ছন্দ্য ভৰা নহয় |

মোৰ জানিবলৈ আগ্ৰহ হৈছিল - এজন সাধাৰণ বৰ্গৰ বিষয়া বা কৰ্মচাৰীয়ে বাৰু ইয়াত কিমান দৰমহা পায়? এটা কথা কৈ থোৱা ভাল যে ইয়াৰ প্ৰায়বিলাক প্ৰতিষ্ঠানতে সাধাৰণতে সাপ্তাহিক হিচাপত বা পষেকীয়া হিচাপত বেতন দিয়াৰ ব্যৱস্থা আছে | সেই হিচাপত বিচাৰ কৰিলে এজন সাধাৰণ বৰ্গৰ কৰ্মচাৰীয়ে $২৫০০ ৰ পৰা $৩৫০০ মান বেতন মাহিলি আৰ্জে | ভাৰতীয় মুদ্ৰালৈ সলনি কৰিলে এই বেতন হ’বগৈ - ১,২০০০০ ৰ পৰা ১,৬৮,০০০ টকা | আপাত দৃষ্টিত এই পৰিমাণ আমাৰ দেশৰ তুলনাত যথেষ্ট বেছি | কিন্তু সাম্প্ৰতিক মূল্যমানলৈ যদি মন কৰোঁ, তেতিয়া দেখা পাওঁ ভাৰতীয় বজাৰৰ তুলনাত অত্যাৱশ্যকীয় সামগ্ৰীৰ সাধাৰণ মূল্য ইয়াত বহুত বেছি | উদাহৰণ স্বৰূপে, ইয়াত এটা ডাঙৰ আকাৰৰ পাওৰুটিৰ দাম $ ৪ অৰ্থাত্‍ প্ৰায় ২০০ টকা, এক কিলো বাচ্‌মতি চাউলৰ দাম $ ৩ অৰ্থাত্‍ প্ৰায় ১৫০ টকা, এক পেকেট মজলীয়া আকাৰৰ ভাল বিস্কুটৰ দাম $ ৩ অৰ্থাত্‍ প্ৰায় ১৫০ টকা ইত্যাদি | এবাৰ চুলি কটোৱাৰ খৰচ অতি কমেও $ ১৫, অৰ্থাত্‍ প্ৰায় ৭০০.০০ টকা | ঠিক সেইদৰে, মধ্যবিত্ত চাকৰিয়ালৰ ইপ্সিত এখন মজলীয়া মানদণ্ডৰ গাড়ীৰ দাম $৩২,০০০ অৰ্থাত্‍ প্ৰায় ১৫,৩৬,০০০.০০ টকা | 

অন্যহাতে, ঘৰ, মাটিকে আদি কৰি স্থাৱৰ সম্পত্তিৰ মূল্য ইয়াত ভাবিব নোৱাৰা ধৰণে বেছি | চান্‌ ডিয়েগোৰ দৰে চহৰততো কথাই নাই | ইয়াত একোটা দুই বা তিনিটা শোৱা কোঠা থকা সাধাৰণ মানদণ্ডৰ ঘৰৰ বৰ্তমান মূল্য প্ৰায় ৩০০- ৫০০ হাজাৰ ডলাৰ আৰু চাৰিওফালে বাৰীৰে আবৃত একোটা বঙলাৰ মূল্য প্ৰায় ২০০ নিযুত ডলাৰ | 

আকৌ, চান্‌ ডিয়েগো চহৰত ভাড়াঘৰৰ বৰ্তমানে চলি থকা ভাড়াৰ নিৰিখলৈ যদি মন কৰা যায়, একোটা দুটা শোৱা কোঠালি-যুক্ত ঘৰৰ মাহিলি ভাড়া প্ৰায় $ ১৫০০-২৫০০, এটা শোৱা কোঠালি-যুক্ত ঘৰৰ মাহিলি ভাড়া প্ৰায় $ ১০০০-১৪০০ | এটা পৰিয়ালৰ সৈতে ৰান্ধনিশাল আৰু অন্যান্য সা-সুবিধা বাতোৱাৰা কৰি চলাৰ চৰ্তত ম‍ই থকা একমাত্ৰ কোঠাটোৰ ভাড়াই হ’ল $ ৬৭৫, অৰ্থাত্‍ প্ৰায় ৩২,৪০০.০০ টকা | এই মূল্যমানলৈ মন কৰিলে সহজেই বুজিব পাৰি যে আমেৰিকান কৰ্মচাৰী এজনৰ মাহিলি বেতনেৰে বৰ্ত্তমান অৱস্থাত কোনোপধ্যে‍ই এক সুখ-স্বাচ্ছন্দ্যৰ বিলাসী জীৱন কটোৱা সম্ভৱ নহয় |

মোৰ জানিবলৈ মন যোৱা আৰু এটা কথা আছিল - আমেৰিকাত এগৰাকী অধ্যাপকে বাৰু কিমান দৰমহা পায় ! আমেৰিকাৰ বিশ্ববিদ্যালয় অধ্যাপকৰ এটা সংগঠন American Association of University Professors ৰ মতে এজন আমেৰিকান অধ্যাপকৰ বছৰি গড় আয় প্ৰায় $ ৯৮,০০০ অৰ্থাত্‍ ৪৭,০৪,০০০.০০ টকা | মাহিলি হিচাপত এই বেতন প্ৰায় ৩,৯২,০০০.০০ টকা | বিভিন্ন স্তৰৰ অধ্যাপকসকলৰ দৰমহাৰ পাৰ্থক্য বিচাৰ নকৰাকৈয়ে এই কথা অৱশ্যে সহজেই বোধগম্য যে অধ্যাপকসকলে আমেৰিকাত এক অতি স্বাচ্ছন্দ্যৰ জীৱন অতিবাহিত কৰিব পাৰে |   

অন্যহাতে, গড় হিচাপত আমেৰিকাত বিদ্যালয় পৰ্যায়ৰ একোজন শিক্ষকৰ বছৰি দৰমহা প্ৰায় $ ৪০,০০০ অৰ্থাত্‍ মাহিলি প্ৰায় ১,৬০,০০০ টকা | [আগলৈ...]

ইংৰাজী ভাষা আৰু শিক্ষাৰ মাধ্যম

ম‍ই আমেৰিকালৈ অহাৰ কিছুদিনৰ আগেয়ে অসমৰ বাতৰি কাকতত, বিশেষকৈ ‘আমাৰ অসম’ত শিক্ষাৰ মাধ্যম সম্পৰ্কে এক দীঘলীয়া আলোচনা আৰু বিতৰ্ক চলিছিল | এইটো বিষয়ৰ বিতৰ্ক কেৱল আজিৰ নহয় | যোৱা ৩০ বছৰমান ধৰি এই বিতৰ্ক বিভিন্ন সময়ত ভিন ভিন মাধ্যমত চলিয়েই আছে বুলিব পাৰি | কিন্তু সঁচা কথা ক’বলৈ গ’লে অসম জাতীয় বিদ্যালয়ৰ আৰ্হিত অন্ততঃ আৰু বহুতো অসমীয়া মাধ্যমৰ বিদ্যালয় চৰকাৰী আৰু বেচৰকাৰী পৃষ্ঠপোষকতাত গঢ় লৈ নুঠা পৰ্য্যন্ত আৰু লগতে অসম মাধ্যমিক শিক্ষা পৰিষদে সঘনাই পাঠ্যক্ৰম আৰু পাঠ্যপুথি সলনি কৰি চলাই থকা পৰীক্ষা-নিৰীক্ষাৰ অন্ত পেলাই সকলোৰে গ্ৰহণযোগ্য এক বিকাশধৰ্মী, বিজ্ঞানসন্মত পাঠ্যক্ৰম প্ৰৱৰ্ত্তন কৰিব নোৱাৰালৈকে এই বিতৰ্কত এটা নিৰ্দ্দিষ্ট পক্ষ লোৱাতো বোধকৰো যুক্তিসঙ্গত নহ’ব | এতিয়া এই সম্পৰ্কে সিদ্ধান্ত লোৱাটো সম্পূৰ্ণ ব্যক্তিগত দৃষ্টিভঙ্গীৰ ওপৰত নিৰ্ভৰ কৰিব | ম‍ই অৱশ্যে নিজে ভাবি-চিন্তি অসমীয়া মাধ্যমৰ সপক্ষেই সিদ্ধান্তটো লৈ মোৰ একমাত্ৰ সন্তানটিক অসমীয়া মাধ্যমতে পঢ়ুৱাইছোঁ | বাৰু যি কি নহওক, আজি ম‍ই এই বিষয়টো অৱতাৰণা কৰাৰ কাৰণটো অলপ বেলেগ |

আমেৰিকাৰ চান্‌ ডিয়েগো চহৰলৈ অহাৰ সময়লৈকে মোৰ এটা ধাৰণা আছিল যে ইয়াত হয়তো ফৰফৰাই ইংৰাজী ক’ব নোৱাৰা বিলাকৰ অৱস্থা অলপ বেয়াই হয় ! যদিও যোৱা ২৫ টা বছৰে ইংৰাজী মাধ্যমত শিক্ষাদান কৰি থকাৰ কাৰণে মোৰ নিজৰ সেই আশংকা নাছিল, তথাপি ভাবিছিলো আমাৰ তুলনাত ইয়াত লগ পোৱা প্ৰায়বিলাক বিজ্ঞানীয়েই হয়তো আমাতকৈ বেছি সলসলীয়াকৈ ইংৰাজী ক’ব | কিন্তু ইয়াত যোৱা তিনিটা মাহত লগ পোৱা হাজাৰ নহ’লেও অন্ততঃ কেইবাশ মানুহৰ সৈতে কথা-বতৰা পাতি মোৰ এই ধাৰণা ভুল বুলি প্ৰমাণ পালো |

চান্‌ ডিয়েগো চহৰ আমেৰিকাৰ শিক্ষা আৰু বৈদ্যুতিন উদ্যোগ (Electronic industry)ৰ এক অন্যতম প্ৰাণকেন্দ্ৰ | ইয়াত প্ৰায় ৩০ হাজাৰতকৈও অধিক বিদেশী ছাত্ৰ-ছাত্ৰী আৰু বিজ্ঞানীয়ে অধ্যয়ন কৰি আছে | ১২০ খনতকৈও অধিক দেশৰ অথবা একে সংখ্যক ভাষা কোৱা মানুহ এই চহৰতে আছে | ক’বলৈ গ’লে ই এখন ক্ষুদ্ৰ পৃথিৱী | ম‍ই আগেয়ে স্থানান্তৰত উল্লেখ কৰিছোঁ যে আমাৰ গৱেষণাগাৰতে মুঠ ১০ খন মান বেলেগ বেলেগ দেশৰ বিজ্ঞানীয়ে কাম কৰি আছে | সংখ্যাৰ হিচাবত চান্‌ ডিয়েগোত আটাইতকৈ বেছি বিদেশী মানুহ আছে চীনদেশ, জাপান, ভাৰত আৰু মেক্সিকোৰ | তাৰ পিচতে আছে ফিলিপাইন্‌চ, আৰ্জেন্টিনা, ব্ৰাজিল আদি দেশৰ | কিন্তু এই বিভিন্ন দেশৰ পৰা অহা লোকসকলৰ সৈতে কথা পাতি মোৰ যি অভিজ্ঞতা হৈছে তাৰ পৰা ম‍ই বুজিব পাৰিছোঁ যে বাকীসকলতকৈ বোধকৰো আমি ভাৰতীয় সকলে ইংৰাজী ভাষা বেছি শুদ্ধকৈ আৰু অধিক সলসলীয়াকৈ ক’ব পাৰোঁ | আচলতে ভাৰতত প্ৰচলিত দ্বি-ভাষিক বা ত্ৰি-ভাষিক শিক্ষাৰ বিপৰীতে ম‍ই আগতে উল্লেখ কৰা প্ৰায়বোৰ দেশতে মূলতঃ একভাষিক অৰ্থাত্‍ তেওঁলোকৰ কেৱল নিৰ্দ্দিষ্ট ৰাষ্ট্ৰীয় ভাষাতহে শিক্ষা প্ৰদান কৰে | ফলত ইংৰাজী শুদ্ধকৈ লিখা আৰু বিশেষকৈ কোৱাৰ বাবে তেওঁলোকে ওপৰঞ্চি প্ৰশিক্ষণ ল’ব লগীয়া হয় |

কিন্তু অন্য এটা কথাও বিশেষভাৱে মন কৰিব লগীয়া | ইয়ালৈ উচ্চ শিক্ষা বা গৱেষণাৰ বাবে অহা লোকসকলে কিমান ভালকৈ ইংৰাজী জানে সেইটো কোনেও কেতিয়াও বিচাৰ নকৰে বা আমাৰ অসমৰ দৰে ইজনে সিজনক কেতিয়াও নাহাঁহে | বৰঞ্চ সকলোৱে বুজিবলৈ বা বুজাবলৈ আন্তৰিকভাৱে চেষ্টা কৰে | শাৰীৰিক ভাৱে অসক্ষম এগৰাকী বিজ্ঞানীয়ে কিদৰে আমাৰ গৱেষণাগাৰত বক্তৃতা প্ৰদান কৰিছিল ম‍ই স্থানান্তৰত উল্লেখ কৰিছোঁৱেই | আটাইতকৈ ডাঙৰ কথা আমেৰিকাত সকলোৰে সমান মৰ্যাদা - কোনোৱে কাকো হীন জ্ঞান নকৰে ! বৰঞ্চ সকলোৱে সততা আৰু সহযোগিতাৰে দুৰ্বলজনক সৰ্বতোপ্ৰকাৰে সহায়হে কৰা দেখিছোঁ | আমি এই শিক্ষাহে ল’ব লাগে |

মুঠৰ ওপৰত অসমীয়া বা অন্যান্য মাতৃভাষাৰ মাধ্যমত অধ্যয়নৰত ছাত্ৰ-ছাত্ৰীসকলে কোনো কাৰণতে ভাবিব নালাগে যে তেওঁলোকে আমেৰিকাৰ দৰে বিদেশী ৰাষ্ট্ৰলৈ পঢ়া-শুনা অথবা চাকৰি কৰিবলৈ আহিলে ভৱিষ্যতে কিবা অসুবিধা পাব | এই ধাৰণা সম্পূৰ্ণ অমূলক | অৱশ্যে পাঠ্যক্ৰমৰ অন্তৰ্ভুক্ত এটা বিষয় হিচাবে সকলোৱে ইংৰাজী লিখা আৰু কোৱাৰ জ্ঞান লাভৰ বাবে যত্‍-পৰোনাস্তি চেষ্টা কৰিব লাগে | ইংৰাজী ভাষা হ’ল জ্ঞানৰ ভঁৰাল | ইংৰাজী ভাষাত বিভিন্ন বিষয়ৰ যিমানবিলাক পুথি ৰচিত হৈছে, বোধকৰো পৃথিৱীৰ অন্য কোনো ভাষাতে এতিয়ালৈকে ৰচিত হোৱা নাই |     

চিজাৰৰ সান্নিধ্যত

৭ আগষ্ট ২০১০

আজি শনিবাৰ | দুপৰীয়া ১২ বজাত মোৰ প্ৰতিৱেশী মেক্সিকোৰ চিজাৰ (Cesar)ৰ লগত বাছেৰে ফুৰিবলৈ বুলি ওলাই গ’লো | প্ৰথমে আমি দুয়ো ব্লেক্‌ মাউন্টেইন এলেকাত থকা ভাৰতীয়  ৰেষ্টুৰাঁখনলৈ গৈ তাত দুপৰীয়াৰ আহাৰ খালো | প্ৰথমবাৰৰ কাৰণে ভাৰতীয় আহাৰ খাই চিজাৰে বৰ ভাল পালে | অৱশ্যে সঁচাকৈয়ে খোৱাখিনি বৰ ভাল আছিল | মুঠতে ২০ বিধমান ভিন ভিন ব্যঞ্জনেৰে বৰ সুন্দৰকৈ পৰিৱেশন কৰিছিল | যেয়ে যিমান ইচ্ছা সিমান খাব পাৰে | প্ৰতিজনৰ খোৱাৰ বাবে দিব লাগে ১৪.২৮ ডলাৰ | দুয়ো দগৰি খালো | সেই মিঠা ব্যঞ্জনৰ সোৱাদ বহুদিনলৈ মনত থাকিব !

যি নহওক, তাত এঘন্টামান কটোৱাৰ পাচত তাৰ পৰা বাহিৰে বাহিৰে ডাউন্টাউন চান্‌ ডিয়েগো (Downtown San Diego)লৈ গ’লো | প্ৰথমে বাছেৰে ফেশ্বন ভেলী (Fashion Valley) নামৰ ঠাইলৈ গৈ তাৰ পৰা দুখন ট্ৰ’লী (Trolley) সলাই এঘন্টামানৰ পাচত গন্তব্যস্থান পালোগৈ | ট্ৰ’লীত প্ৰথমবাৰৰ বাবে উঠিলো | 

এটা কথা ভাল যে আমাৰ দুয়োজনৰে হাতত চিটিবাছৰ কাৰণে থকা মাহেকীয়া কাৰ্ডকেইখনেৰেই যিকোনো বাছৰ উপৰিও ট্ৰ’লীতো উঠিব পাৰি | তাৰ বাবে বেলেগে প‍ইচা দিব নালাগে | এইটো এটা বৰ সুবিধা | অৱশ্যে অহা-যোৱা কৰোঁতে চাৰিওখন ট্ৰ’লীত ক’তো কোনেও টিকট পৰীক্ষা কৰা দেখা নাপালো | নাগৰিকৰ সততাৰ ওপৰত দেখিছোঁ চৰকাৰৰো অপৰিসীম বিশ্বাস !

ডাউন্টাউনত চিজাৰে এখন বাৰত সোমাই অলপ সুৰাপান কৰিলে | মোক সোধোঁতে ম‍ই সুৰাপান নকৰোঁ বুলি কোৱাত তেওঁ তাত সোমাব খোজা নাছিল | কিন্ত্ত ম‍ই ক’লো যে ম‍ই নিজে নাখাওঁ যদিও তেওঁক এনেয়ে লগ দিম, তেওঁ মান্তি হ’ল | বাৰৰ ভিতৰত হ’লিউডৰ চিনেমাত দেখা ধৰণৰ পৰিৱেশ - চাৰিওফালে কেইবা শ মানুহে একেলগে মদ্যপান কৰি আছে | সুন্দৰ ব্যৱহাৰ  আৰু মাৰ্জিত সাজ-পোচাকেৰে গাভৰু কেইগৰাকীমানে পানীয় পৰিৱেশন কৰিছে | কিন্ত্ত ক’তো কোনো বিশৃংখলতা চকুত নপৰিল | এটা দীঘলীয়া গিলাচত ১৩ ডলাৰ দি কিনা সুৰা চিজাৰে অকলে শেষ কৰিব নোৱাৰি বটলত ভৰাই লৈ আহিব পৰা যাবনেকি সুধিছিল | কিন্ত্ত পৰিচাৰিকা গৰাকীয়ে জনালে যে চান্‌ ডিয়েগোত সেইটো নিষিদ্ধ | 

আৰু এটা কথা দেখিলো বাৰখনত সোমোৱাৰ সময়ত প্ৰতিজন ব্যক্তি ১৮ বছৰ বয়সৰ ওপৰৰ হয়নে নহয় সন্দেহ হ’লেই পৰীক্ষা কৰাৰ ব্যৱস্থা আছে | প্ৰয়োজন বোধ কৰিলে তেওঁলোকে উপযুক্ত প্ৰমাণৰ বাবে নথিপত্ৰও বিচাৰিব পাৰে | আনহাতে চিজাৰক সুৰাপান কৰিবলৈ দিয়াৰ আগতে তেওঁলোকে পৰিচয় পত্ৰখন বিচাৰিছিল | তেওঁ আমেৰিকান নহয় বুলি কোৱাত তেওঁৰ পাচপ’ৰ্টখন পৰীক্ষা কৰিছিল | এটা কথা জানি থোৱা ভাল যে বিদেশত থাকোতে সদায় লগত পাচপ’ৰ্টখন ৰাখিব লাগে | যিকোনো সময়ত নিজৰ পৰিচয় পত্ৰ হিচাবে দেখুৱাবলৈ এইখনেই হ’ল গ্ৰহণযোগ্য নথি |

দিনত ইমানেই খালো যে ৰাতি ছেইছ’ আৰু ম‍ই দুয়োজনে একো খাবলৈ মন নকৰিলো |

৮ আগষ্ট ২০১০

আজি দেওবাৰ যদিও দিনটো ক’তো ওলাই যোৱা নহ’ল | সন্ধিয়া চিজাৰে প্ৰস্তাৱ দিলে - তেওঁ মেক্সিকান খানা ৰান্ধি খুৱাব | আমাৰ ঘৰৰ মালিকে কালিয়েই আমি দুয়োজনে খাবৰ কাৰণে ভালেখিনি তাৰ্কিৰ মাংস দিছিল | সেই মাংসৰ সত্‍ ব্যৱহাৰ হ’ল | তেওঁ ৰন্ধা প্ৰকৰণ বিধৰ নাম আছিল খেচাৰিয়া | ইংৰাজীত (Khesarilla) বুলি লিখে যদিও ম‍ই আগেয়ে এঠাইত উল্লেখ কৰাৰ দৰে দুটা `l' থাকিলে ‘য়’ উচ্চাৰণ হয় | এখন বহল ৰুটিৰ নিচিনা টৰ্টিয়া (Tortilla)ৰ ভিতৰত মাংস, চিজ্‌ (Cheese), কটা পিয়াঁজ আৰু চাল্‌ছা (Salsa) নামৰ মেক্সিকান মছলা ভৰাই তেৱাত সেকি এইবিধ খাদ্য তৈয়াৰ কৰে | চাল্‌ছা হ’ল বিলাহী, পিয়াঁজ আৰু অন্যান্য মছলাৰ এক মিশ্ৰণ | খেচাৰিয়া খাই বেছ ভালেই লাগিল | দুটা খাই ভোক গুচি গ’ল |  

৯ আগষ্ট ২০১০

আনদিনাৰ দৰে পুৱা ৮:১০ বজাত ঘৰৰ পৰা খোজ কাঢ়ি ওলাই গৈ ম‍ই সদায় ৰোৱা নিৰ্দ্দিষ্ট বাছ ৰোৱা ঠাইত গৈ ৰৈ আছিলো | বাছৰ সঠিক সময় ৮:৩২ বজা | ঠিক সময়তে বাছ আহি পালে - কিন্তু দেখোন ৰখোৱাৰ নাম নাই ! ওপৰলৈ চাইহে দেখিলো সন্মুখৰ বৈদ্যুতিন ফলক (Electronic Board)ত লিখা আছে - "Bus full" বুলি, গতিকে নৰখালে | ইয়াত সকলোবোৰ বাছতে সন্মুখৰ ফলকত এইদৰে বাছৰ নম্বৰ অৰ্থাত্‍ পথ নম্বৰ আৰু গন্তব্যস্থানৰ বিষয়ে লিখা থাকে | কিন্তু এনেকৈ "Bus full" বুলি লিখা থকা আজিহে দেখিলো | আমাৰ গুৱাহাটীৰ চিটিবাছৰ নিচিনাকৈ পাণ জপাদি যাত্ৰী নাজাপে ! আচলতে আগষ্ট মাহৰ পৰা প্ৰায়বিলাক শিক্ষানুস্থানতে নতুন শিক্ষা বছৰ আৰম্ভ হৈছে; গতিকে বহুতো নতুন ছাত্ৰ-ছাত্ৰী, বিশেষকৈ বিদেশৰ ছাত্ৰ-ছাত্ৰী আহি চান্‌ ডিয়েগো চহৰ ভৰি পৰিছে | জাক পাতি-পাতি চীনদেশীয় আৰু জাপানী ল’ৰা-ছোৱালী এইকেইদিন একোখন বাছত উঠে | মোৰ গৱেষণাগাৰটো পোৱাৰ আগে আগে ৰেডি মেনেজ্‌মেন্ট ইন্‌ষ্টিটিউট (Redi Management Institute) নামৰ এটা শিক্ষানুষ্ঠান পায় | তাত সিদিনা দেখিলো একেলগে কথা পাতি পাতি প্ৰায় ২০-২৫ জনমান চীনদেশীয় ছাত্ৰ-ছাত্ৰী বাছৰ পৰা নামিছে | দেখিলে এনে ভাৱ হয় যেন এইখন চীনদেশৰহে শিক্ষানুষ্ঠান !

ৰাস্তাত বাছ নৰখোৱাত মোৰহে নগুৰ-নাগটি হ’ল | পিচৰখন বাছ আহিব ৯:০৭ বজাত, অৰ্থাত্‍ আধাঘন্টামানৰ পাচত | ইমান সময় ৰাস্তাত থিয় হৈ থকাতোও মস্কিল ! গতিকে খোজকাঢ়ি আগৰ ষ্টপেজটোলৈ বুলি আগবাঢ়িলো | এইটো ষ্টপেজ আকৌ এক ফাৰ্লংমান আঁতৰত - টিলা এটাৰ ওপৰত অৱস্থিত - VA Medical Centre নামৰ চিকিত্‍সালয় এখনৰ সন্মুখত | তাত যাত্ৰীসকলৰ বহাৰ কাৰণে আসনৰ ব্যৱস্থা আছে | গতিকে তালৈকে আগবাঢ়িলো |     

কথাচহকী আমেৰিকান !

২৫ জুলাই ২০১০

আজি দুপৰীয়া ডঃ ক্ষীৰোদ গগৈক প্ৰথমবাৰৰ বাবে লগ পালো | তেওঁ মোক দুপৰীয়াৰ আহাৰ একেলগে কৰাৰ কাৰণে নিমন্ত্ৰণ জনালে | দুপৰীয়া ১ মান বজাত তেওঁ আহি মোক গাড়ীৰে লৈ গ’ল ব্লেক্‌ মাউন্টেইনৰ ভাৰতীয় খাদ্যৰ বিশেষ ৰেষ্টুৰাঁ খনলৈ | দুয়ো একেলগে বেচ্‌ ভালকৈ এসাজ জুতি লগাই খালো | তেওঁৰ সৈতে বহু কথা পাতিলো | তেওঁৰ ঘৰ শিৱসাগৰৰ আমগুৰিত | যোৰহাট বিজ্ঞান মহাবিদ্যালয়ৰ পৰা স্নাতক স্তৰৰ শিক্ষা সাং কৰাৰ পাচত গুৱাহাটী বিশ্ববিদ্যালয়ৰ পৰা ৰসায়ন বিজ্ঞানত স্নাতকোত্তৰ ডিগ্ৰী লয় | বাঙ্গালোৰৰ ভাৰতীয় বিজ্ঞান প্ৰতিষ্ঠান (Indian Institute of Science)ৰ পৰা পি, এইচ্‌, ডি ডিগ্ৰী লাভ কৰাৰ পাচত ইয়াত প্ৰাক-স্নাতকোত্তৰ গৱেষণা (Post-doctoral research)ৰ কাৰণে দুবছৰৰ আগেয়ে যোগদান কৰে | বৰ্তমানে তেওঁ অবিবাহিত; কিন্তু অহা চেপ্তেম্বৰ মাহৰ ১৯ তাৰিখে তেওঁৰ বিয়া ঠিক হৈ আছে | গতিকে অচিৰেই তেওঁ সংসাৰ কৰিব | দুবছৰ চান-ডিয়েগোত থকাৰ পাচতো অসমীয়াত্বৰ ওপৰত অলপো প্ৰভাৱ নপৰা প্ৰথমজন অসমীয়াক লগ পাই বৰ আনন্দ লাগিল | ইয়াত স্থায়ী ভাৱে থকাৰ ইচ্ছা হেনো তেওঁৰ নাই | কেইবছৰমান গৱেষণা কৰাৰ পাচত ভাৰতলৈ ঘূৰি গৈ চাকৰি কৰাৰ মন | ম‍ই তেওঁক প্ৰাণভৰি শুভেচ্ছা জনালোঁ |

২৮ জুলাই ২০১০

ডঃ মাইকেলৰ বিশ্বস্ত সহযোগী ষ্টেফানৰ সৈতে মোৰ গৱেষণাৰ অগ্ৰগতি সম্পৰ্কে আলোচনা কৰিলো | চলি থকা কামটোৰ প্ৰণালীটো কিছু সাল-সলনি কৰাৰ বাবে তেওঁ পৰামৰ্শ দিলে | বৰ্তমানে ব্যৱহাৰ কৰি থকা এটা জৈৱিক উপাদানৰ মানদণ্ড সম্পৰ্কে ম‍ই সন্দেহ প্ৰকাশ কৰাত তেওঁ মানি লৈ সেইটো সলনি কৰাৰ ব্যৱস্থা কৰি দিলে | তেওঁৰ কথা-বতৰাবোৰ অত্যন্ত চিধা-চাধা আৰু মানুহজন বৰ সহানুভূতিশীল যেন লাগে | গৱেষণাগাৰৰ সৰহখিনি কাম তেওঁ তদাৰক কৰে আৰু ডঃ মাইকেলক নিয়মিতভাৱে অগ্ৰগতিৰ খতিয়ান দিয়ে | জন্মসূত্ৰে তেওঁ এজন জাৰ্মান | ময়েই যথেষ্ট ওখ বুলি সকলোৱে কয় যদিও তেওঁৰ ওচৰত থিয় হ’লে মোৰ নিজকে বাওনা যেনহে লাগে | মোতকৈ ছয় ইঞ্চিমান ওখ হ’ব বোধহয় !

৩০ জুলাই ২০১০

দুদিন আগেয়ে ষ্টেফানৰ লগত হোৱা আলোচনা মৰ্মে আজি নতুন জৈৱিক উপাদান আহি পোৱাত মোৰ কাম পুনৰ পূৰ্ণগতিত আৰম্ভ কৰিলো আৰু ভবামতেই ফল পালো | বৰ আনন্দ লাগিল | আজি আন এটা কাৰণতো আনন্দ লাগি আছে যে আজি ম‍ই আমেৰিকাত দুটা মাহ অতিক্ৰম কৰিলো |

২ আগষ্ট ২০১০

গৱেষণাৰ কাম লাহে লাহে আশা কৰা মতেই আগবাঢ়িছে | ইপ্সিত ফলাফল পাই এইকেইদিন মনটো ভাল লাগি আছে |

ম‍ই নতুনকৈ যোগদান কৰা অন্‌লাইন অভিধান ’শব্দ’ৰ সমন্বয়ক বিক্ৰম বৰুৱাই আজি মোলৈ ফোন কৰিছিল | কথা পাতি বৰ ভাল লাগিল | ম‍ই এতিয়া এই অভিধানলৈ শব্দৰ বৰঙণি যোগোৱা সদস্যসকলৰ শীৰ্ষত আছোঁ | কি আনন্দ আৰু আত্ম-সন্তুষ্টিৰ কথা !

ৰাতি ১১:৩০ বজাত ঠিক বিচনাত পৰোঁতেই গুৱাহাটীৰ পৰা অৰুণাভে ফোন কৰিলে | চিলমিল টোপনিৰ পৰা উঠিলো যদিও ফোনটো পাই বৰ ভাল লাগিল | পিচত স্কাইপৰ জৰিয়তে আমাৰ কলেজৰ ৰাতুলদা, যোগদেৱ আৰু মোৰ সহকৰ্মীসকলৰ সৈতে বহু সময় কথা পাতিলো | তেওঁলোকৰ পৰা কলেজৰ শেহতীয়া খ-খবৰবোৰ পাই ভাল পালো |

৩ আগষ্ট ২০১০

গৱেষণাগাৰৰ পৰা বিদায় লোৱাৰ বাবে পুৱা ১০ বজাত তাৰ্কিৰ নেফিছেই চাহ-জলপানৰ ব্যৱস্থা কৰিছিল | পৰহিলৈ তাই যাবগৈ | তাই আজি বেছ্‌ আবেগিক হৈ পৰিছে ! কম বয়সীয়া ছোৱলীতো ! দুপৰীয়া ১২ বজাত আলোচনা কক্ষত আমি সকলো সমবেত হ’লো | নেফিছে আৰু লুকাচে এজন-এজনকৈ নিজৰ গৱেষণাৰ ফলাফল সম্পৰ্কে বিশদ বক্তব্য ডাঙি ধৰিলে | কিছু সময় আলোচনা-বিলোচনা কৰাৰ পাচত গৱেষণাগাৰৰ তৰফৰ পৰা সকলোকে পিজ্জাৰে আপ্যায়িত কৰিলে | আমাৰ গৱেষণাগাৰত কিন্তু খোৱা-বোৱা বেছ্‌ চলে ! যিদিনাই কিবা চেমিনাৰ বা মিটিং থাকে, দুপৰীয়া বেছ্‌ ভালকৈ খোৱা-বোৱাৰ ব্যৱস্থা কৰে |

আজি সন্ধিয়া পুনৰ ৰাতুলদা, ৰোহিণীদা আৰু পৃথ্বিৰাজ মজিন্দাৰ বৰুৱাৰ সৈতে স্কাইপৰ জৰিয়তে কথা পাতিলো | অসম চৰকাৰে আমাৰ মাহিলী দৰমহাৰ হাৰ বৃদ্ধি কৰাৰ বিষয়ে ৰাতুলদাই সবিশেষ জনালে |

৮ আগষ্ট ২০১০

আজি ৰাতিপুৱা গৱেষণাগাৰত প্ৰায় দুঘন্টা জুৰি সুৰক্ষা বিষয়ক প্ৰশিক্ষণ অনুষ্ঠিত হ’ল | সকলোৱে এই প্ৰশিক্ষণত ভাগ লোৱাটো বাধ্যতামূলক | কেলিফৰ্ণিয়া ৰাজ্যিক চৰকাৰৰ বৃত্তিগত স্বাস্থ্য (Occupational Health) বিভাগৰ দুজন বিষয়াই আহি এই প্ৰশিক্ষণ প্ৰদান কৰিলে | ইয়াৰ সকলো প্ৰতিষ্ঠানতে এনে ধৰণৰ সুৰক্ষা আৰু নিৰাপত্তা বিষয়ক প্ৰশিক্ষণ প্ৰতি বছৰে অনুষ্ঠিত হয় | তদুপৰি বিভিন্ন প্ৰতিষ্ঠানত নিৰাপত্তা বিষয়ক সা-সুবিধা আৰু বিশেষকৈ গৱেষণাগাৰৰ সুৰক্ষা-পৰিৱেশ সম্পৰ্কে মাজে মাজে পৰিদৰ্শন কৰাৰো ব্যৱস্থা আছে | কৰ্মচাৰীৰ সুৰক্ষা সুনিশ্চিত কৰাটো সকলো কৰ্ত্তৃপক্ষৰে আইনসঙ্গত দয়িত্ব |

আবেলি ঘূৰি যাওঁতে বাছত এটা আমোদজনক অভিজ্ঞতা হ’ল | আমাৰ বাছখনত তিনিজনী নতুনকৈ অহা জাপানী ছোৱালী উঠিল | সমুখৰ পথালিকৈ থকা আসনতে এফালে এজনী আৰু আনফালে তিনি জনী বহিল | আনহাতে আগলৈ মুখ কৰা আসনৰ প্ৰথম খনতে বহি গৈছিল এজন আমেৰিকান ভদ্ৰলোক; প্ৰায় ৫০ বছৰমান বয়সীয়া | মানুহজন বৰ কথা চহকী ! অকলশৰীয়াকৈ বহা ছোৱালীজনীক না-না তৰহৰ প্ৰশ্ন সুধি ছোৱালীজনীক ব্যতিব্যস্ত কৰি তুলিছিল | সৰু সৰু চকুৰে গোল মুখৰ বিশ বছৰমান বয়সীয়া মৰম লগা ছোৱালী | ম‍ই বহিছিলো তাইৰ ফালে থকা সন্মুখলৈ মুখ কৰা প্ৰথম আসনখনত | প্ৰথম অৱস্থাত তাই ভালকৈয়ে উত্তৰ দি আছিল যদিও শেষলৈ অতিষ্ঠ হৈ পৰিল | দুয়োৰে মাজত যাত্ৰী অহা-যোৱা কৰা ৰাস্তাটো থকাৰ কাৰণে কথা পাতিবলৈও যথেষ্ট অসুবিধা ! কিছু সময়ৰ পাচত পিচৰ ফালে এখন দুজনীয়া আসন খালি হোৱাত তাই ঘপহ্‌ কৰে উঠি তাত বহিলগৈ | কিন্তু কি হ’ব ! আমাৰ কথাচহকী ভদ্ৰলোকো কম নহয় ! তেৱোঁ উঠি গৈ তাইৰ কাষতে বহি ল’লে | এইবাৰ আৰু তেওঁক কোনে পায় ! গোটেই ৰাস্তাটো ছোৱালী জনীৰ অৱস্থাটো দেখি মোৰ বৰ পুতৌ জন্মিছিল ! কিন্তু একো কৰাৰো উপায় নাছিল |

সৰ্বসাধাৰণতে ইয়াত দেখিছো সৰহভাগ আমেৰিকানে অনাহকত বেছি কথা নাপাতে | বাছৰ কথা বাদেই, আনকি বজাৰ-সমাৰতো কোনো হাই-উৰুমি নাই | কোনোৱে সাধাৰণতে উচ্চ স্বৰত কথা নকয় | সেইটো তেওঁলোকৰ বাবে অভদ্ৰামিৰ পৰিচায়ক |         

লচ্‌ এঞ্জেলিচ ভ্ৰমণ

২৪ জুলাই ২০১০

আজিৰ দিনটো বোধকৰো ম‍ই এতিয়ালৈকে ইয়াত কটোৱা আটাইতকৈ আনন্দৰ দিন আছিল | পুৱা ৭ বজাত ঘৰৰ পৰা ওলাই আৰ্জেণ্টিনাৰ লুকাচ্‌, চীনদেশৰ মাৰ্ক (আচল নাম- লি পাই, Li Pie) আৰু তুৰ্কীৰ নেফিচেৰ সৈতে লচ্‌ এঞ্জেলিচ Los Angeles)লৈ গ’লো | আগদিনাই ইন্টাৰনেটৰ যোগেদি আমি টিকট কাটি থৈছিলো | পুৱা ৭:৩০ বজাত স্থানীয় হায়াট্‌ হোটেল (Hyat Hotel)ৰ পৰা যাত্ৰা আৰম্ভ কৰিলো | যোৱাৰ আগেয়ে মাৰ্ক আৰু ম‍ই হায়াট্‌ হোটেলৰ সৌন্দৰ্যও চাৰিওফালে ঘূৰি-পকি চালো | কলকাতাত থকা এনে এখন হায়াট্‌ হোটেলতে ২০০১ চনত ১৫ দিন থকাৰ সৌভাগ্য হৈছিল | সপ্ত-তাৰকাযুক্ত (7-Star) হোটেল | সঁচা কথা ক’বলৈ গ’লে সেয়াও আছিল এক অতি স্মৰণীয় অভিজ্ঞতা ! জাপান চৰকাৰৰ পৃষ্ঠপোষকতাত কলকাতাত অৱস্থিত ৰাষ্ট্ৰীয় কলেৰা আৰু আন্ত্ৰিক ৰোগৰ গৱেষণা প্ৰতিষ্ঠান (National Institute of Cholera and Enteric Diseases) ত অনুস্থিত এক আন্তঃৰাষ্ট্ৰীয় প্ৰশিক্ষণত সেইবাৰ অংশ ল’বলৈ গৈছিলো |

যিখন শীত-তাপ নিয়ন্ত্ৰিত বিলাসী বাছেৰে আমাক লচ্‌ এঞ্জেলিচলৈ লৈ গৈছিল, তাতো এটা কথা দেখি আচৰিত হৈছিলো যে বাছখনৰ চালকজনে অকলেই সকলো চম্ভালে | অৰ্থাত্‍ বাছ চালনাৰ উপৰিও তেওঁ পৰিচাৰক হিচাবে টিকট পৰীক্ষা কৰে, যাত্ৰীসকলক প্ৰয়োজনীয় দিহা-পৰামৰ্শ দিয়ে আৰু লগতে যাত্ৰীসকলৰ কাৰণে পথ-প্ৰদৰ্শক বা গাইড (guide) হিচাবেও কাম কৰে | গাড়ী চলাই গৈ থাকোঁতে তেওঁ ৰাস্তাত অতিক্ৰম কৰি যোৱা বিভিন্ন গুৰুত্বপূৰ্ণ ঠাইবিলাকৰ বিষয়ে বহু কথা কৈ যায় | ইয়াত মানুহৰ কৰ্মদক্ষতা আৰু কৰ্ত্তব্যনিষ্ঠা দেখিলে সঁচাই আচৰিত হ’ব লাগে | আমি ভাৰতীয়সকলে, বিশেষকৈ অসমীয়াসকলে অনুকৰণ কৰিবলগীয়া বহু কথাই আছে !

চান্‌ ডিয়েগোৰ পৰা কিছুদূৰ গৈয়েই আমি অৰেঞ্জ কাউন্টি (Orange County)ৰ আৰ্ভাইন (Irvine) নামৰ অঞ্চলটো পাৰ হৈ গৈছিলো | ঠিক আৰ্ভাইন পোৱাৰ আগে আগে  আমেৰিকাৰ এটা নৌ-সেনাৰ ঘাটি (Naval Base) পায় | তাত আটাইতকৈ দেখি আচৰিত হ’বলগীয়া বিষয়টো আছিল এই যে ৰাস্তাৰ বাওঁফালে প্ৰায় দুই মাইলমান বিস্তৃত এলেকাত অৰ্থাত্‍ প্ৰায় হাজাৰবিঘা মাটিত নৌ-সেনাৰ জোৱানসকলে আধুনিক বিজ্ঞানসন্মত পদ্ধতিৰে আলু খেতি কৰি গঢ়ি তোলা বৃহত্‍ কৃষিপামখন | আমাৰ চালক-গাইডজনৰ মতে ইয়াত উত্‍পাদিত আলু নৌ-সেনা বাহিনীয়ে ব্যৱহাৰ কৰাৰ উপৰিও চান্ ডিয়েগো চহৰকে ধৰি সমগ্ৰ কেলিফৰ্ণিয়া ৰাজ্যক যোগান ধৰে |

প্ৰায় আঢ়ৈ ঘণ্টাৰ পাচত আমি গৈ লচ্‌ এঞ্জেলিচ পালোগৈ | প্ৰথমতে আমি ইংৰাজী বোলছবিৰ প্ৰাণকেন্দ্ৰ হ’লিউডত কিছুসময় কটালো | তাৰ পৰা বিখ্যাত ডিচ্‌নীলেণ্ড হৈ আমাক হ’লিউডৰ আটাইতকৈ প্ৰখ্যাত ইউনিভাৰ্চেল ষ্টুডিও (Universal Studio)লৈ লৈ গ’ল | গোটেই দিনটো আমি এই ষ্টুডিওটোতে কটালো | তালৈ গৈ মোৰ হাইদৰাবাদৰ ৰাম’জী ফিল্ম চিটি (Ramoji Film City) খনলৈ মনত পৰিল | যোৱা তিনিবছৰ মানৰ আগেয়ে ৰাষ্ট্ৰীয় কৃষি গৱেষণা ব্যৱস্থাপনা একাডেমী (National Academy of Agricultural Research Management)লৈ এটা প্ৰশিক্ষণৰ কাৰণে যাওঁতে তালৈ গৈছিলো | এইটো ষ্টুডিও যেন তাৰেই এক পূৰ্ণাঙ্গ সংস্কৰণ | বোলছবি জগতৰ বিভিন্ন অত্যাধুনিক কাৰিকৰী কৌশল প্ৰদৰ্শিত কৰা বহুকেইটা বেলেগ বেলেগ দৰ্শনীৰ ব্যৱস্থা তাত আছে | সপ্তাহান্তিক বন্ধৰ দিন কাৰণে অত্যন্ত ভীৰ | একোটা দৰ্শনীত প্ৰৱেশ কৰিবৰ বাবে প্ৰায় ২০/২৫ মিনি সময় দীঘলীয়া শাৰি পাতি থিয় হৈ থাকিব লাগে | আমি গোটেই দিনটো তাত অতিবাহিত কৰিও আটাইবোৰ দৰ্শনী চাব নোৱাৰিলো | বিশেষকৈ ইয়াত জুৰাচিক পাৰ্ক (Jurassic Park), ৱাটাৰ ৱৰ্ল্ড (Water World), স্পেচিয়েল ইফেক্ট (Special Effect) আদিৰ অনুস্থান উপভোগ কৰি বৰ ভাল লাগিল | কেৱল লগত পৰিয়ালটো নথকা বাবে, বিশেষকৈ মোৰ একমাত্ৰ কণ্যা বাৰ্বিৰ কাৰণে অলপ খেদ হৈছিল | তেওঁলোকে এইবিলাক দেখা হ’লে কিমান আনন্দ পালেহেঁতেন !

‘নিৰ্বান’ নামৰ ঘৰটো

হ’লিউডৰ মাজমজিয়াত এটা অলপ পুৰণি ঘৰ দেখা পাই আচৰিত হ’লো যে তাৰ সন্মুখত ‘নিৰ্বান’ বুলি ইংৰাজীতে লিখা আছে | নামটোলৈ চাই কোনো ভাৰতীয়ৰ ঘৰ হ’ব যেন লাগে ! থাউকতে চলন্ত গাড়ীৰ পৰাই এখন ফটো তুলি ল’লো |

মানসিক ভাৰসাম্য হেৰুৱা মহিলাগৰাকী

লচ্‌ এঞ্জেলিচৰ ৰাস্তাত হঠাতে মুক্ত মনে চিঞৰি পথচাৰীক গালি বৰষি থকা দূৰ্ভগীয়া এগৰাকী মানসিক ভাৰসাম্য হেৰুৱা মহিলা দেখা পালো | আমেৰিকাৰ দৰে উন্নত দেশৰ ৰাস্তাত এনে দৃশ্য দেখিম বুলি ম‍ই আশা কৰা নাছিলো |

বন্ধুকেইজনৰ সৈতে বেচ্‌ কিছু ফটো তোলা হ’ল | আমাৰ চাৰিওজনৰে চাৰিটা ডিজিটেল কেমেৰা; পাচত সকলোৰে কেমেৰাত বন্দী ফটো বিনিময় কৰা হ’ব | সন্ধিয়া ৮:৩০ বজাত ঘূৰি আহি ঘৰ পালোহি | ডঃ মাইকেলৰ গাড়ী এখন তুৰ্কীৰ ছোৱালীজনীক বৰ্তমান ব্যৱহাৰ কৰি থাকিবলৈ দিছে | তাই আমাৰ গোটেই কিজনকে ঘৰে ঘৰে থৈ গ’ল | 

মেক্সিকো নহয়, মেসিকো

মেসিকোৰ চেইচ’

১৩ জুলাই ২০১০

কেইবাদিন ধৰি দিনলিপিত একো লিখা হোৱা নাই | সকলোখিনি গতানুগতিকভাৱে চলি আছে | লিখিবলৈ বিশেষ একো নাই |

আজি পুৱা বাছত ভাৰতীয় যুৱক এজনৰ সৈতে চিনাকি হ’লো | নাম অমনজোট সিং, পাঞ্জাৱী যুৱক, বিবাহিত | পত্নীয়ে কেলিফৰ্ণিয়া বিশ্ববিদ্যালয়ৰ চান ডিয়েগো চৌহদত পঢ়ি আছে  আৰু তেওঁ নিজে স্ক্ৰিপ্‌চ গৱেষণা প্ৰতিষ্ঠান (Scripps Research Institute)ত প’ষ্ট ডক্টৰেল ফেল’ (Post-doctoral fellow) হিচাবে যোৱা ছমাহ মান আগৰ পৰা কাম কৰি আছে | সদ্যহতে দুবছৰৰ কাৰণে আহিছে যদিও তেওঁৰ ফেল’শ্বিপ (Fellowship)টো পাঁচ বছৰলৈকে সম্প্ৰসাৰণ কৰাৰ সম্ভাৱনা আছে | অমনে মোক কেলিফৰ্ণিয়া বিশ্ববিদ্যালয়ৰ চান ডিয়েগো চৌহদত প’ষ্ট ডক্টৰেল ফেল’ হিচাবে কৰ্মৰত ক্ষীৰোদ গগৈ নামৰ অসমীয়া ল’ৰা এজনৰ কথা ক’লে | মোক পৰিচয় কৰাই দিয়াৰ প্ৰতিশ্ৰুতি দিলে | খবৰটো শুনি ভালেই লাগিল |

মোৰ গৱেষণাৰ কাম কালিৰে পৰা পূৰ্ণ গতিত আৰম্ভ হৈছে | চাৰিযোৰা প্ৰাইমাৰ (Primer) লৈ কৰা প্ৰথমটো পি, চি, আৰ্‌ (PCR) পৰীক্ষা আজি সফলতাৰে মান্যতা প্ৰদান (standardize) কৰা হ’ল | এতিয়া পৰ্যায়ক্ৰমে বাকী ১৫ যোৰা প্ৰা‍ইমাৰৰ কামখিনি কৰিব লাগিব |

১৬ জুলাই ২০১০

আজি ৰাতিপুৱা ৰাস্তাত এটা বৰ মনপৰশা অভিজ্ঞতা হ’ল | বাছ ধৰিবলৈ খোজ কাঢ়ি গৈ থাকোঁতে ৰাস্তাতে মোৰ হাঁচি অহাত জেপৰ পৰা ৰুমালখন উলিয়াই নাক-মুখত সোপা দি হাঁচি এটা মাৰিলো | সিফালৰ পৰা আহি থকা এগৰাকী বয়োজ্যেষ্ঠা ভদ্ৰ মহিলাই তপৰাই মাত লগালে, "God bless you !" অচিনাকি মহিলাৰ কি সৌজন্যসূচক আত্মীয়তা ! অভিভূত হ’লো |

আজি দুদিনমানৰ আগেয়ে আন এটা বৰ ভাল লগা অভিজ্ঞতা হৈছিল | একেদৰে ৰাতিপুৱা গৱেষণাগাৰলৈ বুলি খোজ কাঢ়ি গৈ থাকোঁতে বিপৰীত দিশৰ পৰা আহি থকা এজন ভদ্ৰলোকে কাষেৰে পাৰ হৈ যাওঁতে "গুড্‌ মৰ্ণিং" দিয়াত ময়ো প্ৰত্যুত্তৰ দিলো | এইদৰে অচিনাকি ব্যক্তিৰ অভিবাদন ইয়াত এক প্ৰচলিত সাধাৰণ ভদ্ৰতা | কিন্তু ভদ্ৰলোকজন কিছুদূৰ আগুৱাই যোৱাৰ পিচত পুণৰ ঘূৰি আহি মোক সুধিলে, "Are you an Indian?" ম‍ই হয় বুলি কোৱাত তেওঁ মোৰ ফালে হালি মোৰ দোঁৱাই ক’লে, " নমস্তে বাবা !, Is it correct ?" ম‍ই প্ৰতি নমস্কাৰ দিলো; আচৰিত আৰু অভিভূত নহৈ নোৱাৰিলো !

১৮ জুলাই ২০১০

এই কেইদিন সপ্তাহৰ শেষৰ সময়খিনি ভাল কাম এটাত কটাবলৈ পাই বৰ সুখী হৈছোঁ | গুগ’ল (Google)ৰ অসমীয়া সংস্কৰণটোৰ কাৰণে খণ্ডবাক্যবোৰ অনুবাদ আৰু সম্পাদনা কৰাৰ কামত লাগিছোঁ | এতিয়ালৈকে ম‍ই প্ৰায় পাঁচশতকৈ অধিক খণ্ডবাক্য সম্পাদনা কৰিলো | আজি কেইদিনমানৰ আগেয়ে ম‍ই নতুনকৈ যোগদান কৰা অনলাইন অসমীয়া অভিধান শব্দ (www. xobdo.org)ৰ ই-দল (e-group)টো ভিন ভিন সদস্যৰ সৈতে যোগাযোগ কৰি একলগে কাম কৰি বৰ ভাল লাগিছে !

আজি দেওবাৰে আবেলি মোৰ ভাৰাঘৰটোতে আন এটা কোঠাত থকা মেক্সিকোৰ ল’ৰা চিজাৰ (Cesar)ৰ লগত ওচৰৰ বজাৰলৈ গ’লো | তেওঁ যদিও ইয়ালৈ স্পেইনৰ এখন বিশ্ববিদ্যালয়ৰ পৰা স্ক্ৰিপ্‌চ গৱেষণা প্ৰতিষ্ঠানত ৰসায়ন বিজ্ঞানৰ গৱেষণাৰ কাৰণে আহিছে, প্ৰকৃততে তেওঁ মেক্সিকোৰ ল’ৰা | তিনিমাহৰ বাবে ইয়ালৈ আহিছে | প্ৰ’টিন সংশ্লেষণ (Protein synthesis)ৰ বিষয়ত গৱেষণা কৰি আছে | তেওঁৰ সৈতে গৈ আমাৰ ভাৰাঘৰৰ ওচৰৰ বজাৰখনত থকা মেক্সিকান ৰেস্তুৰাঁ এখনত বুৰিট’ (Burrito) নামৰ এবিধ সুস্বাদু খাদ্য খালো | এখন ডাঙৰ ৰুটিৰ ভিতৰত মগু দাইল, বুট ভজা, সেউজীয়া শাকৰ চালাদ, মুৰ্গীৰ মাংস, পাচলিৰ ভাজি, ক্ৰিম আদি ভৰাই থোৱাৰ নিচিনা; আমাৰ চিকেন ৰ’ল (Chicken roll)ৰ যেন এক বৃহত্‍ সংস্কৰণহে | তাৰ লগত যিকোনো এবিধ ক’ল্ড দ্ৰিংক (Cold drink) ৰ এগিলাচ খাব পাৰি | বুৰিট’ মেক্সিকোৰ এবিধ অতি জনপ্ৰিয় খাদ্য | খাই বেচ্‌ ভালেই লাগিল |

এটা কথা ইয়ালৈ আহি গম পালো যে মেক্সিকো, আৰ্জেন্টিনা আৰু স্পেইন এই তিনিওখন দেশতে প্ৰচলিত প্ৰধান ভাষা হ’ল স্পেনীচ্‌ (Spanish) ভাষা | এই ভাষাৰ এটা অন্যতম বৈশিষ্ট হ’ল আমাৰ অসমীয়া ভাষাৰ নিচিনাকৈ এই ভাষাতো ‘স’ উচ্চাৰণটো আছে | তেওঁলোকে মেক্সিকো (Mexico)ৰ উচ্চাৰণ কৰে ‘মেসিকো’ বুলিহে | ‘স’ উচ্চাৰণৰ বাবে তেওঁলোকে ইংৰাজী ‘x’ আখৰটো ব্যৱহাৰ কৰে | তাৰ মানে গুৱাহাটীৰ চেন্টিনেল (The Sentinel) কাকতৰ ভূতপূৰ্ব সম্পাদক ধীৰেণ বেজবৰুৱা ডাঙৰীয়াই অসমীয়াৰ ‘স’ উচ্চাৰণৰ বাবে ‘x’ ব্যৱহাৰ কৰা নিয়মটো প্ৰৱৰ্তন কৰাৰ কাৰণে যি উদ্যোগ হাতত লৈছিল তাৰ যথেষ্ট গ্ৰহণযোগ্য ভিত্তি আছে ! চিজাৰে ‘অসম’ আৰু ‘অসমীয়া’ শব্দকেইটা সম্পূৰ্ণ শুদ্ধকৈ উচ্চাৰণ কৰিব পাৰে |

চান্‌ ডিয়েগোৰ ‘লিটল্‌ ইণ্ডিয়া’

২ জুলাই ২০১০
আজি পুৱা হংকঙৰ য়লাণ্ডে চেং আৰু আৰ্জেণ্টিনাৰ লুকাচ পন্টেলৰ সৈতে চান ডিয়েগো ৰাজ্যিক বিশ্ববিদ্যালয় (San Diego State University)লৈ গ’লো | মাইক্ৰ’এৰে (microarray)ৰ শ্লাইড (slide) কেইখন পৰীক্ষা কৰাৰ কাৰণে প্ৰয়োজনীয় উচ্চ ক্ষমতা সম্পন্ন এৰে স্কেনাৰ (Array scanner) যন্ত্ৰ সেই বিশ্ববিদ্যালয়ৰ জীৱ বিজ্ঞান বিভাগতহে আছে | আমাৰ গৱেষণাগাৰে তেওঁলোকৰ সেই যন্ত্ৰ ব্যৱহাৰ কৰাৰ বাবে চুক্তি স্বাক্ষৰিত কৰি থোৱা আছে |

কি সুন্দৰ বিশ্ববিদ্যালয় চৌহদ ! চাৰিওফালে বিভিন্ন ফুলেৰে জাতিষ্কাৰ গছ-গছনিৰে ভৰা এক সুপৰিকল্পিত ব্যৱস্থা | গাড়ী ৰখা ঠাই‍ৰ পৰা প্ৰায় এক মাইল মান খোজ কাঢ়ি গৈ বিভাগটো পালো | কেন্দ্ৰীয়ভাৱে শীত-তাপ নিয়ন্ত্ৰিত এক অতি সুন্দৰ, পৰিপাটি বিভাগ ! প্ৰায় দুঘন্টামান তেওঁলোকৰ পৰীক্ষাগাৰত কাম কৰাৰ পাচত ঘূৰি আহিলো |

কেইবাদিনো ধৰি ঘৰৰ সৈতে যোগাযোগ নাই | আগেয়ে কিনা কলিং কাৰ্ড (calling card) খনৰ মূল্য শেষ হ’ল | সেইখন আছিল মাদাৰ ইণ্ডিয়া কলিং কাৰ্ড (Mother India calling card) | একে ধৰণৰ সস্তীয়া কাৰ্ড ম‍ই থকা ঠাইৰ ওচৰে-পাজৰে বিচাৰি পোৱা নাই | অনলাইন (online) কিনাৰ ব্যৱস্থা আছে যদিও মোৰ ষ্টেট বেংক অৱ ইণ্ডিয়া (State Bank of India)ৰ ডেৱিট কাৰ্ড (International Gold card) খনৰ সহায়ত অনলাইন কিনা-বেচা কৰিব পৰা নাই | আচলতে আমেৰিকালৈ আহিলে পৰাপক্ষত লগত এখন ক্ৰেডিট কাৰ্ড (credit card) লৈ অহা ভাল | তেতিয়া প্ৰায়বিলাক ক্ষেত্ৰতে বহুত সুবিধা হয় | যি নহওক, সোনকালে কিবা এটা বিকল্প ব্যৱস্থা কৰিব লাগিব | এনেয়ে সকলো সময়তে নিঃসঙ্গ অনুভৱ কৰোঁ, এতিয়া ঘৰৰ সৈতে যোগাযোগ কৰিব নোৱাৰিলে আৰু অধিক ভূগিব লাগিব !

৩ জুলাই ২০১০

আজি শনিবাৰ | অহা মঙ্গলবাৰলৈকে তিনিদিন একেলেথাৰিয়ে বন্ধ | সোমবাৰে আমেৰিকাৰ স্বাধীনতা দিবসৰ বাবে ৰাষ্ট্ৰীয় বন্ধৰ দিন | প্ৰকৃততে স্বাধীনতা দিৱস ৪ জুলাই, দেওবাৰেহে | কিন্তু দিৱসটো বন্ধদিনত পৰা কাৰণে ৰাষ্ট্ৰীয় বন্ধ সোমবাৰে দিছে | এইটো‍ও এটা আমাৰ দেশৰ তুলনাত আচহুৱা ব্যৱস্থা ! অৱশ্যে আমাৰ ৰাজ্য চৰকাৰৰ নিচিনাকৈ ইয়াত বছৰৰ ৫০/৬০ দিন বন্ধ নাথাকে | ইয়াত চৰকাৰী বন্ধ সাধাৰণতে মাত্ৰ বছৰটোত ১০ দিন মানহে |

পুৱাই ঠিক কৰিলো আজি যেনেতেনে এখন কলিং কাৰ্ডৰ যোগাৰ কৰিব লাগিব ! সেইমতে পুৱা ১০ বজাত ঘৰৰ পৰা ওলাই গ’লো | যোৱাৰ আগেয়ে ইন্টাৰনেটত গুগ’লৰ মানচিত্ৰত ব্লেক মাউন্টেইন (Black Mountain) এলেকাটোৰ অৱস্থান ভালকৈ চাই ল’লো | কালিয়েই সেইফালে যোৱা ৯২১ নং বাছৰ দিক্‌দৰ্শী মানচিত্ৰখন ইন্টাৰনেটৰ পৰা উলিয়াই লৈ ছপা কৰি থৈছোঁ | ইয়াত এইটো এটা অতি সুবিধাৰ কথা যে যিকোনো এখন ঠাই বা দোকানৰ নাম শুদ্ধকৈ জানিলে গুগ’লৰ মানচিত্ৰৰ সহায়ত অতি সহজে সন্ধান কৰি উলিয়াব পাৰি | আনকি কিমান নং বাছত উঠি কেইটা ষ্টপেজৰ পাচত ক’ত নামিব লাগিব সেইটোও শুদ্ধকৈ জানি ল’ব পাৰি |

দুপৰীয়া ১২-৩০ বজাত গৈ গন্তব্যস্থান পালোগৈ | ব্লেক্‌ মাউন্টেইন এলেকাত এখন ভাৰতীয় বজাৰ আছে, নাম দিছে ‘লিটল্‌ ইণ্ডিয়া চেন্টাৰ (Little India Center)’| ব’ম্বে বাজাৰ (Bombay Bazar) নামৰ এখন বৃহত্‍ গেলামালৰ দোকান আৰু ওচৰে-পাজৰে ভাৰতীয় খাদ্যৰ কেইবাখনো ৰেষ্টুৰাঁ | ভাৰতীয় ষ্টেট বেংকৰ কেলিফৰ্ণিয়া শাখা এটাও তাতে আছে |

ব’ম্বে বাজাৰত মূলতঃ সকলো ভাৰতীয় খাদ্য সামগ্ৰী (গেলামাল) পোৱা যায় | দাম অৱশ্যে বহুত বেছি | আমাৰ তাতকৈ প্ৰায় ৩/৪ গুণ অধিক | তাৰ পৰাই কেইবিধমান খাদ্য-বস্তু কিনিলো | লগতে চাৰিখন মাদাৰ ইণ্ডিয়া কলিং কাৰ্ড | $৫ ডলাৰৰ একোখন কাৰ্ডৰ সহায়ত ৩০০ মিনিটলৈকে কথা পাতিব পাৰি |

সন্ধিয়া ফোন কৰি বাব্‌লিহঁতৰ লগত মন খুলি বহু সময় কথা পাতিলো | কেইবাদিনৰ পৰা জমা হৈ থকা কথাখিনি একেলগে বাকি দিলো ! আগদিনা বেছি ৰাতিলৈকে পঢ়ি টোপনি ক্ষতি কৰি পাচদিনা মাইনাই বিজ্ঞানৰ পৰীক্ষা গা বেয়া লগাৰ কাৰণে দিব নোৱাৰা বুলি জানিহে বৰ বেয়া লাগিল ! আজিকালি আমাৰ স্কুলীয়া ছাত্ৰ-ছাত্ৰী বিলাকৰ ওপৰত পঢ়া-শুনাৰ বোজা ইমান বেছি হৈছে যে পৰীক্ষাৰ সময়ত পঢ়া শেষ কৰিব নোৱাৰি তেওঁলোক বিমোৰত পৰে আৰু এনে ধৰণৰ স্বাস্থ্য হানিকৰ কাম কৰে ! তাইক অলপ ভালকৈ বুজাব লাগিব | দেহা থাকিলেহে বেহা !

চান্‌ ডিয়েগোৰ সৌন্দৰ্য - ২

চান্‌ ডিয়েগোৰ সৌন্দৰ্যৰ আন এটা দিশ হ’ল ইয়াৰ বাট-পথসমূহ | বাট-পথসমূহ অতি সুন্দৰ | প্ৰায়বিলাক মূল পথতে অতি কমেও চাৰিটাকৈ লে’ন (Lane) | কিন্তু মাজত আমাৰ গুৱাহাটীৰ দৰে ডিভাইদাৰ (Divider) নাই | মাত্ৰ দুডাল হালধীয়া ৰঙৰ আঁচ টনা থাকে | কিন্তু সকলোৱেই নিজৰ নিজৰ গাড়ী নিৰ্দ্দিষ্ট লে’নত চলায় | ইয়াত আমাৰ দেশৰ নিচিনাকৈ গাড়ী পথৰ বাওঁফালে নচলায়; সোঁফালেহে চলায় | সেই কাৰণে চালকৰ আসন হ’ল বাওঁফালে | ৰাস্তাৰ দুয়োকাষে প্ৰায়বিলাক গুৰুত্বপূৰ্ণ স্থানতে ধুনীয়া ফুলনি অথবা ৰঙীন পাতৰ গছ | সেইবিলাক প্ৰতিপালন কৰে চৰকাৰী কৰ্মচাৰীয়ে | কিন্তু প্ৰতিপালনৰ সকলোবিলাক কাম-কাজ যন্ত্ৰচালিত |পুৱা যন্ত্ৰচালিত ডাঙৰ ডাঙৰ কটাৰী আৰু কেঁচীৰে গছৰ ডাল কটা দেখি বৰ ভাল লাগে | কটা ডাল-পাত বিলাক লগে লগে অন্য এটা যন্ত্ৰেৰে সৰু সৰু টুকুৰা কৰি এখন বন্ধ ট্ৰাকত ভৰাই লৈ যায় | আমাৰ মিউনিচিপালিটিৰ গাড়ীয়ে জাবৰ কঢ়িয়াওঁতে গোটেই ৰাস্তাত সিঁচি থৈ যোৱাৰ দৰে নহয় | ৰাস্তাৰ কাষৰ গছত পানী দিয়াৰ বাবে স্বয়ংচালিত জিঞ্জিৰী (sprinkler)ৰ সু-ব্যৱস্থা আছে | কাহিলী পুৱাতে সেইবিলাক চলাই দিয়ে, যাতে পিচত পথচাৰীৰ অসুবিধা নহয় | ঠিক তেনেদৰে ৰাস্তা পৰিস্কাৰ কৰা কামো নিচেই পুৱাতে কৰা হয়, তাকো কৰে ভেকুৱাম ক্লিনাৰ (Vacuum cleaner) আৰু ব্ল’ৱাৰ (Blower)ৰ সহায়ত |

আগতে এটা সময়ত এই সমগ্ৰ দক্ষিণ কেলিফৰ্ণিয়া অঞ্চলটো এখন মৰুভূমি-সদৃশ ঠাই আছিল | কিন্তু মানুহে নিজৰ প্ৰচেষ্টাৰে ইয়াক কিদৰে আজিৰ বিতোপন চান্‌ ডিয়েগো চহৰলৈ পৰিৱৰ্তিত কৰিলে সি সঁচাকৈয়ে অতি প্ৰশংসনীয় ! এটা আন্তঃৰাষ্ট্ৰীয় সমীক্ষা মতে ই বৰ্তমান পৃথিৱীৰ আটাইতকৈ বাসোপযোগী স্থানসমূহৰ ভিতৰত পঞ্চম |

পথচাৰীয়ে ৰাস্তা পাৰ হওঁতে অগ্ৰাধিকাৰ লাভ কৰে | তেওঁলোক পাৰ হওঁতে যান-বাহন বিলাক বহু আঁতৰত ৰৈ দিয়ে | অৱশ্যে প্ৰায় প্ৰতিটো গুৰুত্বপূৰ্ণ সংযোগস্থলতে পথচাৰীয়ে ৰাস্তা অতিক্ৰম কৰাৰ বাবে ৰাস্তাৰ ওপৰত বগা আঁচ টানি থোৱা আছে | পাৰ হোৱাৰ আগতে তেওঁলোকে এটা কাষতে খুটাত থকা বুটাম টিপি সংকেতলৈ বাট চাব লাগে | ৰাস্তা ইপাৰ সিপাৰ হ’বলৈ এনেদৰে কেতিয়াবা তিনিবাৰ ৰাস্তা পাৰ হ’ব লগীয়া হয় |

Freeway

আমাৰ দেশৰ দৰে কিন্তু পথৰ নিয়ম মনাৰ বাবে জনতাক বাধ্য কৰিবলৈ ইয়াত ৰাস্তাই-ঘাটে সৰ্বসাধাৰণতে কোনো আৰক্ষীৰ লোকক দেখা পোৱা নাযায় | কিন্তু সকলোৱে স্বেছাই সকলো নিয়ম নিয়াৰিকৈ পালন কৰে | অৱশ্যে প্ৰয়োজন হ’লে মূহুৰ্ত্তৰ ভিতৰতে আৰক্ষীৰ লোক যিকোনো স্থানত উপস্থিত হয়, কোনোবাই ৯১১ ফোন নম্বৰত ফোন কৰি দিলেই হ’ল | আনহাতে আমাৰ ৰাষ্ট্ৰীয় ঘাইপথবোৰৰ দৰে ইয়াৰ মূল বা আন্তঃৰাজ্যিক পথসমূহত ৰাস্তাৰ একেবাৰে সোঁফালৰ লে’নটোৱেদি মাজে মাজে পুলিচৰ গাড়ী অহা-যোৱা কৰি থাকে আৰু যান-বাহন সমূহ নিৰীক্ষণ কৰি থাকে | প্ৰতিটো অঞ্চলৰ বাবে বান্ধি দিয়া গতিবেগৰ উচ্চ সীমা চেৰাই যোৱা যান-বাহন যিকোনো মূহুৰ্ত্তত ৰখাই জৰিমনা বিহাৰ ব্যৱস্থা আছে | এনে হাইৱে বোৰক ইয়াত ফ্ৰি-ৱে (Freeway) বুলি কয় | এনেবিলাক ৰাস্তাত দুজন বা ততোধিক আৰোহী থকা গাড়ী চলাচল কৰাৰ কাৰণে এক বিশেষ লে’ন থাকে | কিন্তু প্ৰায় শতকৰা ৯০ ভাগ গাড়ীতে আৰোহী এজনহে, কিয়নো সৰহসংখ্যক মানুহৰে পৰিয়ালত সকলো প্ৰাপ্তবয়স্ক সদস্যৰে নিজা নিজা গাড়ী আছে | 

প্ৰায়বিলাক নাগৰিকে গাড়ী চলাওঁতে লগত জি, পি, এচ্‌ অৰ্থাত্‍ Global Positioning System নামৰ সৰু সঁজুলি এটা লগত লৈ ফুৰে | এইটোৰ সহায়ত অতি সহজে যিকোনো এখন ঠাইৰ দিক্‌নিৰ্দেশনা সঠিককৈ জানি ল’ব পাৰি | মাত্ৰ ঠাই বা দোকানখনৰ নিৰ্ভুল ঠিকনাটো জানিলেই হ’ল | ই কোনটো পথেদি কেতিয়া কোনফালে ঘূৰিব লাগিব সময়ে সময়ে আপোনাক কৈ যাব | মাথো অনুসৰণ কৰি সেইমতে গৈ থাকিলেই হ’ল |

এটা কথা কিন্তু ঠিক | জনসাধাৰণৰ সুবিধাৰ বাবে আমাৰ দেশত থকা ৰাজহুৱা পৰিবহন ব্যৱস্থা ইয়াতকৈ অধিক সুলভ | ইয়াৰ চিটিবাছ বিলাক কেৱল মূল ৰাস্তাসমূহতহে, বিশেষকৈ চহৰৰ কেন্দ্ৰস্থলতহে বেচি উপলব্ধ | আমাৰ দৰে দূৰ্ভগীয়া যাৰ গাড়ী নাই, সি অশেষ অসুবিধাৰ সন্মুখীন হ’ব লগীয়া হয় | চিটিবাছ বিলাকৰ ইখন-সিখনৰ মাজত সময়ৰ ব্যৱধানো প্ৰায় আধা ঘণ্টা | এখন বাছ ধৰিব নোৱাৰিলে বহু সময় অপেক্ষা কৰিব লাগে | অৱশ্যে চিটিবাছৰ চলাচল পূৰা সময়মতে হয় | গুৰুত্বপূৰ্ণ আস্থান বিলাকত আগতীয়াকৈ আহি পালে বাছবিলাক আনকি কিছু সময় ৰখাই থৈও সময় মিলাই লয় | সকলোবোৰ বাছেই শীত-তাপ নিয়ন্ত্ৰণৰ ব্যৱস্থা থকা | বাছৰ প্ৰথম কেইখনমান আসন বয়োবৃদ্ধ আৰু বিকলাঙ্গ লোকৰ বাবে সংৰক্ষিত | নক’লেও হ’ব যে এই নিয়ম মানি সকলোৱে স্বেচ্ছাই এনে আৰোহীৰ বাবে আসন এৰি দিয়ে | বাছত আনকি হুইল চেয়াৰ (Wheel chair) উঠোৱাৰো সুবিধা আছে | প্ৰয়োজন হ’লে প্ৰথমৰ আসনকেইখন কোঁচাই তাৰ কাৰণে চালকে ঠাই উলিয়াই দিয়ে | বাছবোৰত আমাৰ দেশৰ দৰে কণ্ডাক্টৰ বা হেণ্ডীমেনৰ ব্যৱস্থাও নাই, সেই চিঞৰ-বাখৰো নাই | কেৱল প্ৰতিটো আস্থান পোৱাৰ আগতে চালকে মাইকত আস্থানটোৰ নাম কৈ দিয়ে | ভাড়া লোৱাৰ ব্যৱস্থাটোও স্বয়ংক্ৰিয় যন্ত্ৰচালিত | প্ৰায়বিলাক আৰোহীয়েই আগেয়ে স্থানান্তৰত উল্লেখ কৰা কম্পাচ্‌ কাৰ্ড (Compass Card) ৰ জৰিয়তে ভাড়া দিয়ে |

চিটিবাছ বিলাকৰ আন এটা বিশেষত্ব হ’ল ইহঁতৰ আকাৰ | প্ৰায়বিলাক বাছৰে আকাৰ আমাৰ গুৱাহাটীৰ ৰাইনো বাছৰ সমান | কিছুমান আকৌ তাৰ দুগুণ | দুখন বাছ জোৰা লগাই থোৱাৰ দৰে | উল্লেখযোগ্য যে আমেৰিকাৰ ৰাজহুৱা পৰিবহন সংস্থাই (American Public Transportation Association) চান্‌ ডিয়েগোৰ মেট্ৰ’পলিটান ট্ৰেঞ্জিত্‍ চিষ্টেম (Metropolitan Transit System) অৰ্থাত্‍ মহানগৰীয় পৰিবহন ব্যৱস্থাটোক ২০০৯ চনৰ বাবে বছৰটোৰ বিশিষ্ট ৰাজহুৱা পৰিবহন সংস্থা (Outstanding Public Transport System of the Year 2009) হিচাবে স্বীকৃতি প্ৰদান কৰিছে |

মানৱতাৰ পৰিচয়

২৩ জুন ২০১০

কেইবাদিনো দিনলিপিত একো লিখা হোৱা নাই | গতানুগতিকভাৱে দিনবোৰ অতিবাহিত হৈছে | পুৱা ৮ বজাৰ পৰা সন্ধিয়া ৬:৩০ বজালৈকে ঘৰৰ বাহিৰত অৰ্থাত্‍ অহা-যোৱাৰ সময়খিনিকে ধৰি গৱেষণাগাৰত ব্যস্ত |

আজি ঘূৰি আহোঁতে প্ৰথমবাৰৰ কাৰণে এজন মগনীয়া দেখা পালো | বাছত উঠি মিছা কথা কৈ প‍ইচা নিদিয়াকৈ সাৰিব খুজিছিল | গাড়ী চালকে অনুমতি নিদিয়াত নামি গ’ল | অৱশ্যে আগতেও এদিন চাৰণৰ লগত গাড়ীৰে যাওঁতে কোনোবা এখন বজাৰৰ ওচৰত এগৰাকী মহিলাই প্লে'-কাৰ্ড এখন লৈ ৰৈ থকা দেখা পাইছিলো | লিখা আছিল - 'Need Help & Food' বুলি | চাৰণে কৈছিল যে ইয়াত ভিক্ষাৰী বিলাকে এইদৰে হাতত প্লে'-কাৰ্ড লৈ প‍ইচা খুজি ফূৰে | উন্নত দেশত ভিক্ষা খোজাৰো উন্নত কায়দা !

আজিৰ পৰা বাৰ্বিৰ ছমহীয়া পৰীক্ষা আৰম্ভ হৈছে| ভগবানে তাইক সহায় কৰক !

২৪ জুন ২০১০

পুৱা এটা নতুন অভিজ্ঞতা হ’ল | বাছত উঠিবলৈ ৰৈ থাকোঁতে ম‍ই উঠিব লগীয়া ষ্টপেজটোতে হুইল চেয়াৰত উপৱিষ্ট এগৰাকী মহিলা নামিল; লগত বোধকৰো তেওঁৰ গিৰীয়েক | প্ৰৌড়া মহিলাগৰাকী নমাৰ সময়ত বাছখনৰ উচ্চতা কমাই দি এখন হেলনীয়া তল (প্লেট্‌ফৰ্ম) দুৱাৰৰ পৰা বাহিৰলৈ উলিয়াই দিলে | সকলোবিলাক যান্ত্ৰিকভাৱে চালকজনে নিয়ন্ত্ৰণ কৰিছিল | কি সুন্দৰ স্বয়ংক্ৰিয় ব্যৱস্থা ! বাছৰ চালকগৰাকী এগৰাকী মহিলা | তেওঁ নিজৰ আসনৰ পৰা উঠি আহি শাৰীৰিকভাৱে অক্ষম মহিলাগৰাকীক বাছৰ পৰা নমোৱাত সহায় কৰি দিলে | মানৱীয়তাৰ কি এক সুন্দৰ পৰিচয় এইখন দেশত ! সকলোবোৰ যান্ত্ৰিক যেন লাগিলেও মানৱীয়তা দেখোন আমাৰ ভাৰতীয় সকলতকৈ অধিকহে ! অভিভূত হ’লো |

২৫ জুন ২০১০

 আজিও এক ব্যতিক্ৰমী অভিজ্ঞতা হ’ল | ১২ বজাত আমাৰ গৱেষাণাগাৰত এক অতিথি বক্তাৰ দ্বাৰা বক্তৃতা প্ৰদানৰ ঘোষণা হ’ল | ডঃ মাইকেলে সকলোকে আহ্বান জনালে আলোচনা কক্ষলৈ আহিবলৈ | উল্লেখ কৰা প্ৰয়োজন যে আমাৰ গৱেষণাগাৰৰ সকলো কোঠা সংযোগ কৰি মাইক্ৰফোনত ঘোষণা দিয়াৰ ব্যৱস্থা আছে | অনাহকত কাগজ আৰু সময় খৰচ কৰি কোনো জাননী আদি দিয়া নহয় |

অতিথি বক্তাজন ডঃ ডব্লিউ য়ু (Dr. W. Yu) - কেলিফৰ্ণিয়া বিশ্ববিদ্যালয়, চান ডিয়েগো (UCSD)ৰ বিজ্ঞানী | যেতিয়া তেওঁ কথা ক’বলৈ আৰম্ভ কৰিলে, আচৰিত হ’লো | তেওঁ শাৰীৰিকভাৱে বাধাগ্ৰস্ত | কথাও স্পষ্টকৈ ক’ব নোৱাৰে | তালুত ফুটা (Cleft pallate) থকা লোকৰ দৰে কথা কয় | কিন্তু ইংৰাজী ক’লে বুজাটো কঠিন হয় | দৈহিকভাৱেও তেওঁ সম্পূৰ্ণ স্বাভাৱিক নহয় | অতি নিশকতীয়া | কাণত শ্ৰৱণ যন্ত্ৰ | কিন্তু তেওঁ প্ৰাকৄতিক দ্ৰব্য (Natural products)ৰ প্ৰ’টিয়মিক্‌চ (Proteomics)ৰ বিষয়ত সাৰগৰ্ভ বক্তৃতা প্ৰদান কৰিলে |  

আচৰিত হ’বলগীয়া কথাটো হ’ল উচ্চাৰণৰ অসুবিধাৰ বাবে তেওঁৰ বক্তব্য বুজা অতি কঠিন হৈছিল যদিও ডঃ মাইকেলে তেওঁৰ বক্তব্য বুজিবলৈ আৰু তেওঁৰ সৈতে মত বিনিময় কৰিবলৈ যত্‍পৰোনাস্তি চেষ্টা কৰিলে | প্ৰকৃততে এনে এজন ব্যক্তিক অতিথি বক্তা হিচাবে মাতি অনাটোৱেই তেওঁৰ মহানুভৱতাৰ অসামান্য পৰিচয় নহয়জানো ? 

২৮ জুন ২০১০

আজিৰ পৰা মোৰ মুখ্য উদ্দেশ্যৰ দিশত আগবাঢ়িছোঁ যেন লাগিছে | মাইক্ৰ’এৰে (Microarray)ৰ প্ৰশিক্ষণ আজিৰ পৰা আৰম্ভ হৈছে | হংকঙৰ পৰা আহি বিগত ২৩ বছৰে আমেৰিকাত কৰ্মৰত বয়স্ক মহিলা য়লাণ্ডে চেঙে (Yollande Cheng) তেওঁৰ মাইক্ৰ’এৰেৰ কাম আৰম্ভ কৰিছে আৰু লগে লগে মোক শিকাই গৈছে | মহিলাগৰাকীৰ কাম বৰ পৰিপাটি আৰু প্ৰতিটো কামতে তেওঁৰ পাৰদৰ্শিতা প্ৰতিফলিত হয় | নিয়াৰিকৈ কৰা কামৰ প্ৰতিটো পৰ্যায় সুন্দৰকৈ বুজাই গৈছে |

মোৰ গৱেষণাৰ কাৰণে নিজে ডিজাইন (design) কৰা নতুন প্ৰাইমাৰ (Primer) খিনিও আজি আহিল | শুক্ৰবাৰে অৰ্ডাৰ কৰা বস্তু সোমবাৰেই আহিল ! কি ক্ষিপ্ৰ ব্যৱস্থা !

২৯ জুন ২০১০

ম‍ই আমেৰিকাত ভৰি দিয়া আজি এমাহ পূৰ্ণ হ’ল | প্ৰথম মাহৰ ফেল’শ্বিপো আজি ভাৰত চৰকাৰৰ পৰা পালো | মোৰ বেংক একাউণ্টত পোনপটীয়াকৈ জমা দিছে |

ভাৰাঘৰৰ প্ৰথম কেইটামান দিন

১৩ জুন ২০১০

ৰাতিপুৱা প্ৰায় এঘণ্টা বাব্‌লিহঁতৰ লগত স্কাইপ (Skype)ৰ জৰিয়তে কথা পাতিলো | ঘৰ এৰাৰ পাচত মাইনাক প্ৰথম দেখা পালো ইণ্টাৰনেটৰ যোগেদি | বৰ ভাল লাগিল |

পাচবেলা পুণৰ চাৰণ আহিল | তাইৰ গাড়ীত উঠি প্ৰথমে  ম‍ই সদায় গৱেষণাগাৰলৈ অহা-যোৱা কৰিব লগীয়া বাছৰ পথটো চিনাকি হ’বলৈ গ’লো | তাই বহুত কষ্ট কৰি মোক উঠা-নমা কৰা ঠাইবিলাক চিনাকি কৰি দিলে | আহোঁতে অলপ খোৱা বস্তুৰ বজাৰ কৰিলো |

মোৰ ভাৰাঘৰটোতে থকা স্পেইনৰ চিজাৰ আৰু ব্ৰাজিলৰ নেলিঅ’ৰ লগত চিনাকি হ’লো | চিজাৰে ৰসায়ন বিজ্ঞান (Chemistry) আৰু নেলিঅ’ই পাৰমানৱিক জীৱবিজ্ঞান (Molecular Biology)ৰ অঙ্কুৰ কোষ (Stem cell)ৰ বিষয়ত গৱেষণা কৰি আছে - পি, এইচ্‌, ডি (Ph.D.)ৰ বাবে |

সন্ধিয়া দুমদুমাত থকা মোৰ বাইদেউ আৰু যোৰহাটত থকা মোৰ সৰু দাদা প্ৰকাশলৈ ফোন কৰিলো |  

১৪ জুন, ২০১০

আজি প্ৰথমবাৰৰ বাবে চাইকেলখন লৈ ৰাতিপুৱা কৰ্মক্ষেত্ৰলৈ ওলালো | ঘৰৰ পৰা বাছ আস্থানলৈকে চাইকেলত গৈ তাৰ পৰা চাইকেলৰে সৈতে বাছত উঠি গ’লো | ইয়াত এইটো এটা সুবিধা | চিটী বাছবিলাকত চাইকেল উঠাই লৈ যাব পৰা সুবিধা আছে | আনকি বহুত সৰু গাড়ীতো এই সুবিধা কৰি লোৱা দেখিছোঁ | কিন্তু ম‍ই চাইকেল চলাইহে বৰ কষ্ট পালো | প্ৰায়বিলাক ৰাস্তাই ওখ-চাপৰ, পাহাৰীয়া ঠাইৰ নিচিনা | গতিকে চাইকেল চলাবলৈ বৰ কষ্ট | কালিলৈ খোজ কাঢ়ি বাছ আস্থানলৈকে আহি চাব লাগিব | মোৰ ঘৰৰ পৰা প্ৰায় ২.৫ কিলোমিটাৰ বাট | বোধকৰো চাইকেল চলোৱাতকৈ খোজ কাঢ়ি আহিবলৈ আৰাম হ’ব | দৈনিক অলপ শাৰীৰিক ব্যায়ামো হ’ব; বেয়া নহয় !

সন্ধিয়া বাব্লি আৰু মাৰ লগত কিছু সময় ফোনত কথা পাতিলো | মাৰ সৈতে কথা পাতি বৰ আনন্দ পালো |  

১৫ জুন ২০১০

কালি চাইকেল চলাই কষ্ট পোৱাৰ কাৰণে আজি খোজ কাঢ়িয়েই ওলাই গ’লো | বাছ আস্থানলৈকে খোজ কাঢ়ি গৈ বেচ্‌ ভালেই লাগিল | অহা যোৱাই অন্ততঃ দৈনিক ৬ মাইল মান বাট খোজ কঢ়া হ’ব |

আজি ডঃ মাইকেলৰ সৈতে মোৰ গৱেষণাৰ সম্পৰ্কে কিছু আলোচনা কৰা হ’ল | দুপৰীয়া এখন চেমিনাৰ আছিল | অন্য এটা প্ৰতিষ্ঠানৰ এজন বিজ্ঞানীয়ে এটা বক্তৃতা প্ৰদান কৰিলে |

 
১৬ জুন ২০১০

আজি ৰাতিপুৱা বহুত খোজ কাঢ়িলো | কৰ্মক্ষেত্ৰলৈ যোৱাৰ আগতে প্ৰায় ৩ মাইল খোজ কাঢ়ি গৈ ভ’নচ্‌ ষ্ট’ৰ নামৰ দোকান এখনৰ পৰা বাছৰ মাহেকীয়া কাৰ্ড (কম্পাছ কাৰ্ড) এখন কিনিলোগৈ | এমাহৰ বাবে $৭২ ডলাৰ দিব লাগে | কাৰ্ড খনৰ দাম দুই ডলাৰ সুকীয়া | গুগ’লৰ ৱেবচাইটত মেপ চায়েই ইয়াত একোখন ঠাই বা একোখন নিৰ্দ্দিষ্ট দোকানৰ অৱস্থিতি সম্পূৰ্ণ শুদ্ধকৈ উলিয়াব পাৰি | এইটো এটা বৰ সুবিধা !

ইয়াত সৰহভাগ মানুহেই সাধাৰণতে নগদ টকাৰ আদান-প্ৰদান নকৰে | বিভিন্ন প্ৰকাৰৰ কাৰ্ডৰ জৰিয়তেহে সকলো বিনিময় চলে |

আজিও গৱেষণাগাৰত এখন চেমিনাৰ আছিল | ডঃ মাইকেলৰ লগত বহি মোৰ কামৰো আৰম্ভণি কৰিলো | প্ৰাইমাৰ ডিজাইনিঙৰ কাৰণে প্ৰথম পৰ্যায়ৰ কামখিনি কৰা হ’ল | তেওঁৰ সৈতে কাম কৰি বেচ্‌ ভাল লাগিল ! 

চান ডিয়েগোৰ অসমীয়া পৰিয়াল

১২ জুন ২০১০

আজি শনিবাৰ, বন্ধৰ দিন | গতিকে গৱেষণাগাৰলৈ যোৱাৰ কথা নাই |

দুপৰীয়াৰ আহাৰৰ কাৰণে এটা অসমীয়া পৰিয়ালে চাৰণৰ লগতে মোকো নিমন্ত্ৰণ কৰিলে | তাতে কেইবাটাও অসমীয়া পৰিয়াল লগ পোৱাৰ সৌভাগ্য হ’ল | গৃহস্থৰ মূল ঘৰ গুৱাহাটীৰ এ, বি, চিৰ ওচৰত | নাম চাজাদুৰ ৰহমান আৰু পৰিবাৰৰ নাম তাজ্‌নিন্‌ | পৰিয়ালটো বৰ অতিথি পৰায়ণ - বৰ ভাল লাগিল | চাজাদুৰে ইয়াত চাৰি বছৰমান আগৰে পৰা চাকৰি কৰি আছে | পেছাত অভিযন্তা | চান ডিয়েগোত এটা নিজা ঘৰ কিনিছে | ঘৰটো সুন্দৰ | তেওঁলোকৰ ঘৰত লগ পোৱা এটা অসমীয়া দম্পতি হ’ল - গুৱাহাটীৰ হাতীগাৱঁৰ উত্‍পল বৰ্মন আৰু তেওঁৰ পৰিবাৰ মৃদুস্মিতা, আৰু আনটো অনুপম আৰু তেওঁৰ পৰিবাৰ প্ৰীতি | অনুপমৰ মাক দেউতাকো আমেৰিকা নিবাসী | উত্‍পল বৰ্মনৰ মাক-দেউতাকো ফূৰিবলৈ আহি ইয়াতে আছেহি | আনহাতে চাজাদুৰৰ মাকো তেওঁলোকৰ লগতে বৰ্তমান আছেহি | তেখেতসকলকো লগ পালো | উত্‍পলৰ দেউতাক হাতীগাৱঁৰ লখিমী নগৰত থাকে - নাম উত্তম চন্দ্ৰ বৰ্মন | তেওঁলোকৰ পুৰণি ঘৰ নলবাৰীৰ চামতাত | কিন্তু বহু বছৰ তেওঁ চাকৰিকাল গুজৰাটত কটাইছিল | ২০০৫ চনত চাকৰিৰ পৰা অৱসৰ লৈ বৰ্তমান গুৱাহাটীৰ বাসিন্দা | অন্য এটা অসমীয়া দম্পতিও আহিছিল | কিন্তু তেওঁলোকে মোৰ সৈতে পৰিচয় হোৱাৰ বাবে কোনো আগ্ৰহ প্ৰকাশ লকৰিলে | এটা কথা মন কৰি আচৰিত হ’লো যে চাজাদুৰৰ পৰিয়ালৰ বাহিৰে বাকী ইয়াত থকা দম্পতিকেইটাই নিজৰ ভিতৰত কথা পাতোঁতে ইংৰাজীতে বেচিকৈ পাতে | বোধকৰোঁ ভাৰতৰ অন্য প্ৰান্তৰ মানুহৰ সৈতে আমাৰ এয়ে পাৰ্থক্য | দিল্লীৰ পৰা চান ডিয়েগোলৈ আহোঁতে নিউয়ৰ্কত লগ পোৱা চেন্নাইৰ মহিলা লক্ষ্মী গোপালাকৃষ্ণনলৈ মনত পৰিল | তেওঁতো সম্পূৰ্ণ ভাৰতীয়ত্ব বজাই ৰাখিছে | টেলিফোনত ঘৰৰ সৈতে মোৰ সন্মুখতে কেইবাবাৰো কথা পাতিছিল | কিন্তু তেওঁ তামিল ভাষাতহে পাতিছিল | ১১ বছৰ আমেৰিকাত থকাৰ পাচতো তেওঁ একেই তামিল হৈ আছিল |

চাজাদুৰৰ ঘৰৰ পৰা বাহিৰে বাহিৰে চাৰণৰ লগত আহি অলপ বজাৰ কৰিলো | এখন চাইকেল আৰু অন্য যাৱতীয় বস্তু-বাহানি কিনাৰ পাচত চাৰণে মোক ভাৰাঘৰত থৈ গ’ল | আজি মোৰ নিজৰ ভাৰাঘৰত প্ৰথম ৰাতি |

আৰম্ভণিৰ কিছু তিতা-কেহা

৯ জুন ২০১০

পুৱা ৭:৩০ বজাতে গৱেষণাগাৰ পালোহি | আনদিনাৰ দৰে চাৰণে গাড়ীৰে থৈ গ’ল | ৰাস্তাত ভিৰ থকাৰ কাৰণে তাইৰ অফিচলৈ বোধকৰোঁ অলপ পলমেই হ’ব | ইয়াত কিন্তু ভিৰৰ মাজতো গাড়ীবোৰে ৰাস্তাত ইখন-সিখনৰ মাজত যথেষ্ট দূৰত্ব ৰাখি চলাচল কৰে | আমাৰ গুৱাহাটিৰ দৰে ওপৰা-উপৰি বা খুন্দিয়া-খুন্দি নকৰে | ৰাস্তাও বহল - প্ৰতিটোতে স্পষ্টকৈ লেন্‌ অঁকা থাকে |

ৰুম সোমাই প্ৰথমে শ্ৰীমতীলৈ ফোন কৰিলো | মাইনাৰ চি, চি, আৰ্‌, টি স্কলাৰশ্বিপৰ নৱীকৰণ পৰীক্ষাৰ খবৰ ল’লো | বহুত সময় বাব্‌লিৰ সৈতে মন খুলি কথা পাতিলো | ভাল লাগিল ! মাজে মাজে সকলোবোৰ বাদ দি ঘূৰি যাবলৈ মন যায় ! ইয়াত সকলোতে ইমান যান্ত্ৰিকতা ! উন্নত দেশ হ’লে কি হ’ব - কাৰো যেন আন্তৰিকতা নাই ! ম‍ই ইয়াত যোগদান কৰা আজি এসপ্তাহতকৈ বেছি হ’ল, অথচ গৱেষণাগাৰৰ কাৰো সৈতে বিশেষ কথা-বতৰাই হোৱা নাই - হাই, হেল্ল’ৰ বাহিৰে | সকলো নিজৰ কাম লৈ ব্যস্ত |

মাজে মাজে ভাৱ হয়, মোৰ জীৱনৰ বোধকৰো আটাইতকৈ আমনি লগা দিনকেইটা অতিবাহিত কৰিছোঁ | পুৱা ৭:৩০ বজাৰ পৰা সন্ধিয়া ৫:৩০ বজালৈকে শীত-তাপ নিয়ন্ত্ৰিত কক্ষত বহি সন্মূখত থকা কম্পিউটাৰত হোৱাই-নোহোৱাই ইণ্টাৰনেটত বিচৰণ কৰি সৰহ ভাগ সময় পাৰ কৰিছোঁ | তাৰ মাজে মাজে অৱশ্যে আৰম্ভ কৰিব লগীয়া গৱেষণাৰ বিষয়ে কিছু অধ্যয়ন কৰিছো | কিন্তু এটা কথাত আচৰিত যে আমাৰ কলেজত ম‍ই ভাৰত চৰকাৰৰ জৈৱ প্ৰযুক্তি বিভাগৰ পৰা পোৱা আৰ্থিক অনুদানেৰে প্ৰতিষ্ঠা কৰা ই-লাইব্ৰেৰীৰ দৰে ব্যৱস্থা ইয়াত নাই | এই ক্ষেত্ৰত আমাৰ সা-সুবিধা এওঁলোকতকৈও ওপৰত |

আজিকালি ইণ্টাৰনেটত প্ৰায়ে অসমৰ বিভিন্ন বাতৰি-কাকতৰ অন্‌-লাইন সংস্কৰণবিলাক উধৰ পৰা মূধলৈকে পঢ়োঁ | ইণ্টাৰনেটত অসমীয়া সমল বিচাৰি চলাথ কৰিছোঁ, কিন্তু ই অতি দুৰ্লভ | বিপুলজ্যোতি শ‍ইকীয়াৰ ৱেবচাইট্‌টোত কিছু তথ্য আৰু সমল পাইছোঁ, কিন্তু সিও সীমিত | গল্প গোটেইকেইটা দুদিনতে পঢ়ি শেষ কৰিলো |

তাৰ্কীৰ পৰা অহা গৱেষিকা ছাত্ৰী জনীয়ে মাজে মাজে লগ পালে চুটিকৈ দুই-এষাৰ কথা পাতে | তাৰ বাহিৰে কাৰো সৈতে কোনো সম্পৰ্ক নাই | কোনেও উপযাচি এষাৰ কথাও নোসোধে | কি অদ্ভূত- এইখন পৃথিৱী ! ভাৱ হয়, আমিবোৰ দুখীয়া দেশত জন্ম হ’লেও ইহঁততকৈ বহুত সুখী ! ’সংগ্ৰাম আন এটি নাম জীৱনৰ’ !

গৱেষণাৰ বাহিৰে বাকীখিনি সময় কেনেকৈনো পাৰ কৰিম জানো ! 

১০ জুন ২০১০

আজি পাচবেলা তুৰ্কীৰ ছোৱালীজনীৰ (নেফিচে- তাইৰ নাম) লগত qPCR ৰ প্ৰক্ৰিয়া সম্পৰ্কে প্ৰায়োগিক ভাৱে কিছু অৱগত হ’লো | প্ৰথমবাৰৰ কাৰণে গৱেষণাগাৰত প্ৰায়োগিক ভাৱে জড়িত হৈ বেচ্‌ আনন্দ লাগিল ! কিন্তু ছোৱালীজনীয়ে খৰখেদা কৰি প্ৰক্ৰিয়াটোত মাজতে ভুল কৰি পেলালে | গতিকে আধাতে কামটো সামৰিব লগীয়া হ’ল | যি হওক দুঘণ্টামান সময় বৰ ভালকৈ অতিবাহিত হ’ল |

১১ জুন ২০১০

দুপৰীয়া চীনদেশৰ বিজ্ঞানী য়ি পেঙৰ বিদায় উপলক্ষে এখন জাপানী ৰেষ্টুৰাঁত গৱেষণাগাৰৰ সকলোৰে লগত দুপৰীয়াৰ আহাৰৰ বাবে গ’লো | জাপানী আহাৰ খাই বেচ্‌ ভাল লাগিল ! সকলোৱে নিজৰ নিজৰ পচন্দ মতে অৰ্ডাৰ দিব লাগে | ম‍ইনো কি দিওঁ! একো এটাৰ নামো নাজানো; সোৱাদৰ কথা বাদেই | এনেয়ে দি দিলো - মুৰ্গীৰ মাংস আৰু ভাত থকা এবিধ ব্যঞ্জন | নামটোবা কি আছিল !

আবেলি আৰ্জেন্টিনাৰ পৰা অহা পি, এইচ্‌, ডি স্কলাৰ লুকাচ্‌ পণ্টেলৰ লগত qPCR-ৰ গোটেই প্ৰক্ৰিয়াটো ভালকৈ প্ৰথমৰ পৰা শেষলৈকে অনুসৰণ কৰিলো | কিছু হাতে-কামেও লাগি দিলো | নিজে অকলে কৰিব পাৰিম যেন লাগিছে | তেওঁৰ গৱেষণাত তেওঁ চাল্‌ম’নেল্লা প্ৰজাতিৰ বেক্টেৰিয়াৰ ৰোগ সৃষ্টিকাৰী গুণৰ ওপৰত তাম আৰু দস্তা ধাতুৰ প্ৰভাৱ সম্পৰ্কে অধ্যয়ন কৰি আছে | তিনি মাহৰ কাৰণে ইয়ালৈ আহিছে যোৱা মে’ মাহৰ আৰম্ভণিত | আমাৰ লগত নতুনকৈ এবছৰৰ কাৰণে চীনদেশৰ পৰা অহা বিজ্ঞানী লি বাই (চুটি নাম - মাৰ্ক) য়েও যোগ দিলে | ৰিয়েল টাইম পি, চি, আৰ্‌ (Real time PCR) যন্ত্ৰৰ কাৰ্য প্ৰণালী পূংখানুপূংখ ভাৱে অধ্যয়ন কৰি আয়ত্ব কৰিলো |

গৱেষণাগাৰত কাম কৰি থাকোতে এজনী ভাৰতীয় ছোৱালীক লগ পালো | নাম - বিনীতা | দিল্লীৰ ভাৰতীয় প্ৰযুক্তিবিদ্যা প্ৰতিষ্ঠান (IIT)ৰ পৰা পাচ কৰা জৈৱ প্ৰযুক্তি বিদ্যা (Biotechnology)ৰ স্নাতক | ২০০৮ চনত বিয়া হৈ চান ডিয়েগোলৈ আহিছে | আমাৰ গৱেষণাগাৰত যোৱা মাৰ্চ মাহৰ পৰা ইন্টাৰ্নি (Internee) হিচাবে যোগ দিছে | ইয়াত হয়তো আমি মাত্ৰ দুজনেই ভাৰতীয় !

ৰাতি চাৰণৰ লগত হিন্দী বোলছবি 'থ্ৰি ইডিয়ট’ (3 Idiots) চালো |